હઠ છે હજી
હઠ છે હજી
જે ગમે તે પામવાની હઠ છે હજી,
આભને પણ આંબવાની હઠ છે હજી,
છે ખબર કે નર્યુ છળ છે આ ઝાંઝવા,
આ હરણને હાંફવાની હઠ છે હજી,
એ નથી દેતા જવાબો એના ભલે,
પણ સવાલો પૂછવાની હઠ છે હજી,
ચોતરફ પથરાયેલા હો પથ્થર ભલે,
આ કૂંપળને ફૂટવાની હઠ છે હજી,
એ સતત માંગ્યા કરે છે મારી ક'ને,
ને મને પણ આપવાની હઠ છે હજી,
જો રહેતો હોય તું તો પે'લે પાર તો,
આ સમંદર લાંઘવાની હઠ છે હજી,
રોજ એ ફાટ્યા કરે છે તો પણ 'શરદ'
જિંદગીને સાંધવાની હઠ છે.