હું કેરી ખૂબ મજાની
હું કેરી ખૂબ મજાની
મને કહેતા સૌ રાની,
હું કેરી ખૂબ મજાની;
પછી શેની રહું છાની !
હું કેરી ખૂબ મજાની.
લેખકો મારા નિબંધ લખે,
કવિઓ ગીત ગાતા;
ભાતચિત્ર ને ભરતગૂંથણમાં
મને છાપી જાતા.
હું તો માનેતી પડદાની,
હું કેરી ખૂબ મજાની.
વસંતઋતુ આવે ને
આંબે બેસે મોર;
ગુજરાતના તાલાળામાં
મારો ખૂબ જ તોર,
હું તો કરાવું મિજબાની,
હું કેરી ખૂબ મજાની.
કાચી મને તોડી લેવા
છોકરાં પથ્થર મારે;
આંબાવાડી ગૂંજી ઊઠે
કોયલના ટહુકારે,
પવન કરે છે નુકસાની,
હું કેરી ખૂબ મજાની.
હાફુસ, કેસર, તોતાપુરી,
લંગડો, દશેરી, બદામ;
મોંમાં પાણી લાવી દેતાં
આવાં અમારાં નામ,
હું તો ઘરે-ઘરે પોં’ચવાની,
હું કેરી ખૂબ મજાની.
ગાડું ભરો ટ્રેકટર ભરો,
ભરી લો ખટારો;
હવાઈજહાજમાં બેસીને
વિદેશ-નિવાસ અમારો,
મને સંસ્કૃતમાં ’આમ્ર’ કે’વાની,
હું કેરી ખૂબ મજાની.
દવાથી પકવશો નહિ,
પાકવા દો કુદરતી;
’ઉતાવળે આંબા પાકે નહિ’,
કહેવત સારી હતી,
હું તો ખૂબ નાચવાની,
હું કેરી ખૂબ મજાની.