હૂંફાળો સથવારો

સખી તારો એ હૂંફાળો સથવારો આજ બહુ સાંભરે રે, 

એક તરફ સઘળી ચિંતાઓ ને એક તરફ એ આશ્લેષ, 

મનનો આ વલવલાટ હવે ક્યાં ઠલવાશે કાંઈ ન જાણું, 

સખી તારો એ હૂંફાળો સથવારો આજ બહુ સાંભરે રે, 

અંતરના ખાલીપાને તરબતર કરતું તારું એ રૂપકડું સ્મિત, 

ને કાજળઘેલા નાજુક શા નયનોનું એ અપલક નીરખવું, 

હવે જાણે ખાવા દોડશે દસે દિશાઓ આમ એકસામટી, 

સખી તારો એ હૂંફાળો સથવારો આજ બહુ સાંભરે રે,

કોલ તો તે જ આપ્યો હતો સખી સાથ નિભાવવાનો, 

આજ અચાનક જ સાથ છોડી તે કર્યો સાવ નોધારો,

જીવન લેતી ગઈ તું હવે ને ખોળિયામાં ધમણ ચાલશે, 

સખી તારો એ હૂંફાળો સથવારો આજ બહુ સાંભરે રે..