ખાળી જાને શ્યામ

જગમંદિરે વધ્યાં તમસ, ગાળી જાને શ્યામ ! 

ગીતા ગાને દીધેલાં વચન, પાળી જાને શ્યામ !

સગાં બન્યાં'તાં તારાય વેરી, કીધો'તો તેં નાશ,

ધૃણા ઘટાડી પ્રેમ પ્રવાહે, વાળી જાને શ્યામ !

ખોટી રીતિ તે ફગાવી, કીધી ગોવર્ધનપૂજા,

ધર્મમાં ધતિંગના ધુમ્મસ, બાળી જાને શ્યામ !

ધૃતરાષ્ટ્ર તો હજુય ઘણેરા, પુત્ર મોહે પીડાતા,

તનયા કેવી કૂખે મરે છે, ટાળી જાને શ્યામ !

રાધાજીનો શ્યામ સલૂણો, પ્રેમનું પ્રતીક,

પ્રેમના નામે વ્યભિચાર જગે, ખાળી જાને શ્યામ !