अशी नटली नवरी
अशी नटली नवरी
सजनाच्या स्वागताला
डोई बाशिंग बांधले
सुखी संसाराचे स्वप्न
जणू डोळ्यात भरले
नथ नाकात मोत्याची
कशी खुलून दिसते
अंगच्याच सौंदर्यात
भर अजून घालते
अंगी हळद लावता
रूप गोजिरे फुलते
मेंदी हाताची रंगते
कळी मनाची खुलते
कसे रोखीयले डोळे
वेध जणू भविष्याचा
भासे घेतसे अंदाज
तिच्या सुखी संसाराचा
मनी दाटले काहूर
कसे असेल सासर
मनातला भाव जणू
सांगे लाजरी नजर
लाल चुटूक हे ओठ
जशी डाळिंबाची फोड
शब्द त्यातून निघता
लागे कानाला ते गोड
काळजात धडधड
उठे मनी शिरशिरी
थोडी लाज, हुरहूर
अशी नटली नवरी