बहुरंगी जीवन
बहुरंगी जीवन
काव्यप्रकार अष्टाक्षरी
जीवनाचे वरदान
देई ईश्वर मानवा
पूर्व प्राक्तनानुसारे
सुख-दुःखांच्या जाणीवा (1)
जीवनात आस कोणा
विश्वशांती मिळण्याची
सुख-दुःख गमे त्यासी
नित्य समसमानची (2)
यज्ञवेदी जीवनाची
ध्येयनिष्ठ बनविती
सुख आशा नि अपेक्षा
सहजचि अर्पियती (3)
दान पाठपूजेपेक्षा
श्रेष्ठ मानवताधर्म
पुण्याईच्या भारे झोळी
वाहे भरुनी सत्कर्म (4)
जीवनाचा रंगमंच
सदा फिरताचि असे
अज्ञातचि मानवासी
क्षण अखेरचा असे (5)