साहेब, तुम्ही राहिले असते तर..

साहेब , तुम्ही राहिले असते

तर खूप बरे झाले असते ;

विद्यार्थ्यात दीर्घउद्योग -चिकाटीचे

गुण तरी रुजले असते .

साहेब ,तुम्ही राहिले असते

तर खूप बरे झाले असते ;

जात- धर्म -भाषा द्वेषाने

राष्ट्रीय ऐक्य दुभंगले नसते .

साहेब, तुम्ही राहिले असते

तर खूप बरे झाले असते ;

शिक्षणाच्या बट्ट्याबोळ न होता

बाजारीकरण तरी झाले नसते .

साहेब, तुम्ही राहिले असते

तर खूप बरे झाले असते ;

सत्ता- खुर्ची पेक्षा देशप्रतिष्ठेला

जास्त महत्त्व राहिले असते .

साहेब , तुम्ही राहिले असते

तर खूप बरे झाले असते ;

स्वातंत्र्य- समता- बंधुता तत्वावर

राष्ट्र उभारले गेले असते .

साहेब ,तुम्ही राहिले असते

तर खूप बरे झाले असते ;

मानवतेला काळिमा फासणारे

" खैरलांजी हत्याकांड" घडले नसते .

साहेब, तुम्ही राहिले असते

तर खूप बरे झाले असते ;

संसद- विधिमंडळात

जोडेनाट्य तरी घडले नसते .

साहेब, तुम्ही राहिले असते

तर खूप बरे झाले असते ;

भारतीय लोकशाही लिलावाचे

अघोरी कृत्य घडले नसते .

साहेब ,तुम्ही राहिले असते

तर खूप बरे झाले असते ;

आपले राष्ट्र "ज्ञानसत्ता" होऊन

" महासत्ता" तरी झाले असते .