ଅମର ଆମ ପ୍ରୀତି
ଅମର ଆମ ପ୍ରୀତି
ପ୍ରୀତି ମଇନା ହୃଦ ଆଇନା
ସିଏ ମୋ ପ୍ରିୟତମା
ପ୍ରେମ ଚକୋରି ମନ ମୟୂରୀ
ରୂପସୀ ନିରୁପମା
ନିରାଶା ମରୁ ଝର
ଶାନ୍ତି ତପୋବନ ସେ ମୋର ସେନେହ ପାରାବାର |
ଯେତେ ଦେଖିଲେ ସେତେସୁନ୍ଦର
ସବୁ ସୁଖର ଖଣି
ହସଟି ତାର କେଡ଼େ ମଧୁର
ମନକୁ ନିଏ କିଣି
ବୀଣା ଜିଣା ତା ବାଣୀ
ଓଢଣା ତଳୁ ନୟନ ବାଣେ ମରମ ଦିଏ ହାଣି |
ରତନାଗାର ରଖିଛି ସିଏ
ସାଇତି ମୋହ ପାଇଁ
ତା ଆଗେ ଛାର ଇନ୍ଦ୍ର ସମ୍ପଦ
ବରୁଣ ପୁର ଛଇ
ସିଏ ମୋ ପ୍ରେମ ତରି
ସଂସାର ସାର ମୋ ଗଳା ହାର କିଏ ହେବ ତା ସରି |
ଯେଦିନୁ ତାର ଧରିଲି କର
ଶୂନ୍ୟ ହେଲା ପୂର୍ଣ୍ଣ
ଦୁଃଖ ଦରିଆ ସୁଖ ବୋଇତ
ଆଶାର ନବଘନ
ମନ ଆକାଶ ଜହ୍ନ
ସହ ଧର୍ମିଣୀ ସହ ମର୍ମିଣୀ ମୋ ପାଇଁ ତୀର୍ଥ ଧାମ |
ବୟସ ଯେତେ ଯାଉଛି ଗଡ଼ି
ବନ୍ଧନ ଚେର ଯାଉଛି ମାଡି
ଆସୁ ସେ ବାତ୍ୟା ଆସୁ ସେ ବନ୍ୟା
ଆସୁ ବିପଦ ଝଡି
ବାହିବୁ ଆମ ତରୀ
ସରଗ ଧାମ ଅମର ପ୍ରେମ ଯିବୁନି କେବେ ହାରି |
ବିଚାରେ ମନ୍ତ୍ରୀ ଆଚାରେ ଲଷ୍ମୀ
ବୁଦ୍ଧିରେ ବୃହସ୍ପତି
ବିପଦେ ସିଏ ଭୂଧର ସମ
ସମ୍ପଦେ ପ୍ରିୟ ସାଥି
ସିଏ ପରମା ସତୀ
ଯୁଗ ଯୁଗର ପ୍ରିୟା ସେ ମୋର ଅମର ଆମ ପ୍ରୀତି |