ବାର୍ଦ୍ଧକ୍ୟ
ବାର୍ଦ୍ଧକ୍ୟ
ଜୀବନ ପଥରେ ଶେଷ ଯାତ୍ରା ମୋର
ବାର୍ଦ୍ଧକ୍ୟ କବଳେ ଦେହ,
ଛାଡ଼ି ଆସିଛି ମୁଁ ଜ୍ଞାତି ପରିଜନ
ତୁଟାଇଛି ମାୟା ମୋହ |
ସଂସାର ମୋହରେ ଛନ୍ଦି ହେଇଥିଲି
ପ୍ରଭୁ ପାଶୁ ଥିଲି ଦୂର,
ମୋହ,ମାୟା ମୋତେ ଏମିତି ଗ୍ରାସିଲା
କାୟା ହେଲା ଛାରଖାର |
ଯାହାକୁ ଭାବିଲି ନିଜଠୁ ନିଜର
ସେହିମାନେ କଲେ ଦୂର,
ପୁତ୍ର,କନ୍ୟା ମୋର ନିଜ ସ୍ୱାର୍ଥ ପାଇଁ
କଲେ ମୋତେ ବ୍ୟବହାର |
ବୃଦ୍ଧ ବୟସରେ ସାହାରା ନପାଇ
ବୁଲିଲି ମୁଁ ବାରଦ୍ୱାର,
ମାଗିଯାଚି କେତେ ଦିନ ବିତାଇବି
ମୃତ୍ୟୁ ଯେ ନିକଟ ମୋର |
ଶେଷ ନିଷ୍ପତ୍ତିରେ ଉପନୀତ ହେଲି
ଚାଲିଯିବି ହରିଦ୍ୱାର,
ଯେଉଁଠି ନଥିବ ସଂସାରର ମୋହ
ଧୋଇଯିବ ପାପମୋର |
ଶେଷ ଇଚ୍ଛା ମୋର ହେ ଜଗତପତି
ଦିଅ ବାରେ ମୋତେ ମୁକ୍ତି,
ଶେଷ ସମୟରେ ତୁମ ନାମ ନେଲେ
ଆତ୍ମା ମୋ ପାଇବ ଶାନ୍ତି |