ବଡ ବନ୍ଧୁ
ବଡ ବନ୍ଧୁ
କେବେ ତ 'ଅବୁଝା ମୋ ପାଇଁ ଲାଗଇ
କେବେ ପୁରା ବୁଝିଯାଏ ,
କେବେ ପାଇଯାଏ ଭରସାର ଭାଷା
କେବେ ପୁଣି ଭାସିଯାଏ ।
ଭଲ ପାଇବାର ସବୁଜିମା ମୋର
ଆଲୁଅ ଅବିର ଧାରେ ,
ଦୁଃଖ, ସୁଖ ମୋର ସବୁ ଭୁଲିଯାଏ
ହଜିଯାଏ ଆବେଗରେ ।
ଭାବର କୋଣାର୍କ ହୁଅଇ ଉନ୍ମନା
କଳ୍ପନା ଜୁଆରେ ବହେ ,
କେବେ ହଜିଯାଏ ଭାବ ବନ୍ଧନରେ
କେବେ ଉଜାଗର ରହେ ।
ଛନ୍ଦହୀନ ମନ ଲାବଣ୍ୟ ଜୁଆରେ
ଝିରି ଝିରି ଝରି ପଡେ ,
ବିଶ୍ଵାସର ଏଇ ମନ ବୃନ୍ଦାବନ
ଆଶାଟି କେବେ ନ'ଛାଡେ ।
ଶିଶିରର ସମ କ୍ଷଣିକ ଜୀବନ
ଶେଷେ ଭେଟ ଶ୍ମଶାନରେ ,
ଶତ୍ରୁତା, ମିତ୍ରତା ତୋର ମୋର ସବୁ
ଜଳିଯାଏ ଯୁଇପ'ରେ।
ବନ୍ଧୁ, ଜଗବନ୍ଧୁ ବଡ଼ ବନ୍ଧୁ ପରା
କ୍ଷଣ ଭଙ୍ଗୁର ଜୀବନେ ,
ବ୍ରହ୍ମାଣ୍ଡର ଭାର ତାଙ୍କରି କାନ୍ଧରେ
ଶରଣ ଛନ୍ଦା ପୟରେ ।