ଭିଜାମାଟି
ଭିଜାମାଟି
ପହିଲି ବରଷା ପହିଲି ପରସେ
ଭିଜାମାଟି ଭାରି ବାସେ
ପୁଲକିତ ହୁଏ ଦିଗ ଚଉଦିଗ
କୀଟ ତରୁଲତା ହସେ ।
ମୁହଁ କୁ ଲୁଚେଇ ଘାସ, ଦୁବଘାସ
ପଡିଥାନ୍ତି ସବୁ ଶୋଇ
ଭିଜାମାଟି ବାସ ଚହଟଇ ଯେବେ
ଉଠନ୍ତି ସେମାନେ ଚେଇଁ ।
ଭିଜାମାଟି ବାସ୍ନା ଭାଙ୍ଗିଦିଏ ସତେ
ବେଙ୍ଗୁଲି ରାଣୀର ନିଦ
ବରଷା ପାଣିରେ ଭିଜିବା ପାଇଁକି
ପଦାକୁ କାଢେ ସେ ପାଦ ।
କଙ୍କଡା ବିଛା ତ ଲୁଚି ରହିଥାନ୍ତି
ଜାକିଜୁକି ହୋଇ କାହିଁ
ବାହାରି ଆସନ୍ତି ପଦାକୁ ସେମାନେ
ଭିଜାମାଟି ବାସ୍ନା ପାଇ ।
ଭିଜାମାଟି ବାସ୍ନା ମନ ଖୁସି କରେ
ଲାଗେ ଭାରି ଡର ପୁଣି
ସାପ ବିଛା ସବୁ ସାଲୁବାଲୁ ହୋଇ
ଦେଖାନ୍ତି ତାଙ୍କର ଠାଣି ।
ତାଙ୍କ ଉପରେତ ପାଦ ପଡିଗଲେ
ମାରି ଦେବେ ସିଏ ଚୋଟ
ହୁସିଆର ଯଦି ନହୋଇବ ତେବେ
ଭିଜାମାଟି ଦେବ କଷ୍ଟ ।