ଚିଠି
ଚିଠି
ଆଖି ଖୋଜୁଥାଏ ତୁମରି ମୁହଁଟି
କାଗଜର ଚିଠି ଖୋଲି
ଅକ୍ଷର ଗୁଡ଼ାକ ନୀଳ ନୀଳ ଦିଶେ
ସତେକି ତୁମରି ଆଖି।୧।
ଗୋପନେ ଗୋପନେ ସବୁ ଲେଖିଦିଅ
ବାକି ରହିଯାଏ କଥା
ମାନ, ଅଭିମାନ କେବେ ବି ସରେନା
ସରେ କାଗଜର ପୃଷ୍ଠା।୨।
କେବେ ଭିଜିଥାଏ କାଗଜର ପୃଷ୍ଠା
ହୁଏନା ତାକୁ ତ ପଢି
ସବୁ ବୁଝିହୁଏ କିଛି ବି ନପଢ଼ି
ତୁମ ବିନା କଟେ ରାତି।୩।
ଲେଖିବି ଲେଖିବି କ'ଣ ଲେଖିବି
କଟିଯାଏ ଅଧାରାତି
ଲେଖିବା ବେଳକୁ ସବୁ ଭୁଲିଯାଏ
ମନେମନେ ହୁଏ ଖୋଜି।୪।
ଦଶ ଥର ଲେଖି ଦଶ ଥର ଚିରେ
କ'ଣ ଲେଖିବି ଆଗ
ତୁମେ ଲେଖିବି ବିନା ତୁ ଲେଖିବି
ଛନ୍ଦି ହୋଇଯାଏ ମନ।୫।
ସୁଖ ଲେଖିବି ନା ଦୁଃଖକୁ ଲେଖିବି
କେମିତି ବୁଝିବ ତୁମେ
ସବୁ ଲେଖିଦେଲେ କଥା ସରିଯିବ
ଛାତି ଭିତରଟା କାନ୍ଦେ।୬।
ଲୁଚେଇ ଲୁଚେଇ ଦଶ ଥର ପଢେ
ଶହେ ଥର ତାକୁ ଛୁଏଁ
ହୃଦୟ ଭିତରେ ରଖିଦେଇ ତାକୁ
ମନେ ମନେ ଖାଲି ଝୁରେ।୭।
ବହି ଖାତା ସବୁ ସମ୍ପଦର ସଖା
ଚିଠି ଦିଆ ନିଆ ପ୍ରେମ
ମୋବାଇଲ କିବା ବୁଝେସେ ବେଦନା
ଅପେକ୍ଷାରେ ଥାଏ ସ୍ୱାଦ।୮।
ବେଳ ହୋଇଗଲେ ଛନଛନ ମନ
ଆଖି ଖୋଜୁଥାଏ ତାକୁ
ଚିଠି ନ ଆସିଲେ ସବୁଲାଗେ ଖଟା
ଭାତ ହୋଇଯାଏ ଜାଉ।