ଗୁରୁ ହିଁ ପରମତପଃ
ଗୁରୁ ହିଁ ପରମତପଃ
ଗୁରୁ ବ୍ରହ୍ମା ଗୁରୁ ବିଷ୍ଣୁ
ଗୁରୁଦେବ ମହେଶ୍ୱର
ଏ ବାଣୀ ଧ୍ୱନିତ ହୁଏ
ହୃଦୟେ ମୋହର ।
ଯାହା ମୁଁ ବୁଝିଛି ତାହା
ନୁହଁଇ ଅନ୍ୟଥା
ଗୁରୁ ସାକ୍ଷାତ ଈଶ୍ୱର
ଗୁରୁ ପିତା ମାତା ।
ଗୁରୁ ନାମେ ସୁଧାଝରେ
ସିକ୍ତ ହୁଏ ପ୍ରାଣ
ଗୁରୁ ମୋର ପରଂବ୍ରହ୍ମ
ଜ୍ଞାନ ର ଝରଣ ।
ଯାହା ନାମ ଧରି ପଙ୍ଗୁ
ଲଙ୍ଘିପାରେ ଗିରି
ସେହି ପରା ଗୁରୁ ମୋର
ପ୍ରାଣ ରକ୍ଷାକାରୀ ।
ଗୁରୁ ମୋର ଅତି ପ୍ରିୟ
ବେଶୀ ଆପଣାର
ତା ହାତ ଆଶୀଷ ଭରା
ଜ୍ଞାନ ପାରାବାର ।
ଜଗତ ର ବଡ଼ ସିଏ
ଆଉ ସବୁ ତୁଚ୍ଛ
କଲ୍ୟାଣ କାରକ ସିଏ
ତା ମମତା ସ୍ୱଚ୍ଛ ।
ଜୀବନେ ରଖେନି କେବେ
ନେବାର ଲାଳସା
ଖୁସିମନେ ପୁରାଏ ସେ
ମୋ ମନର ବାଞ୍ଛା ।
ସେହି ଗୁରୁ ପାଦେ ନମଃ
କରୁଛି ସତତ
ତୁମ ପୂଜା ଦିନ ଆଜି
ଘେନ ପ୍ରଣିପାତ ।
ତୁମ ଜ୍ଞାନ ପାରିଜାତ
ଫୁଟାଅ ମହୀରେ
ହିଂସା ଦ୍ୱେଷ ଅଜ୍ଞାନତା
ନ ରହୁ କା'ଠାରେ ।
ତୁମ ଅଲୌକିକ ମନ୍ତ୍ର
ବାଜୁ ସର୍ବ କର୍ଣ୍ଣେ
ଉଦ୍ଭାସିତ ହେଉ ପ୍ରାଣ
ତୁମ ଜୟ ଗାନେ ।
ମୋର ସମଗ୍ର ଅସ୍ତିତ୍ବ
ତୁମ ଦୟାବଳେ
ପୂଜ୍ୟ ପୂଜା ସମ୍ଭାର କୁ
ଥୋଇ ପାଦତଳେ ।
ଅପରୂପ ପ୍ରାଣବନ୍ତ
ହେ ଚଳନ୍ତି ଠାକୁର
ସ୍ନେହ ଅନୁରାଗେ ଘେନ
ପାଦ ପୂଜା ମୋର ।