ହେ ଦେବୀ

ହେ ଦେବୀ ତୁମେ ପରମ ବୈଷ୍ଣବୀ

ପାର୍ବଣ ଲଗନେ ଆସ‌‌‌ ଆସ;

ଆତୁରେ ଆକୁଳେ ଡାକୁଛି ପୃଥିବୀ

ଧୋଇ ନିଅ ଯେତେ ଅଛି କ୍ଳେଶ;

ହେ ଦେବୀ ତୁମେ ପରମ ବୈଷ୍ଣବୀ।।

ଶାରଦୀୟ ଜହ୍ନ ଆକାଶେ ଉଜ୍ଜ୍ୱଳ

ରୂପେଲି ରଙ୍ଗ ରୋଷଣୀ ଫେଇ;

ନଦୀ ନଦ ଭରା କାଚ କେନ୍ଦୁ ଜଳ

କାଶତଣ୍ଡି ହସେ ରହି ରହି;

ଅମୀୟ ପ୍ରକୃତି ବେଶ;

ହେ ଦେବୀ ତୁମେ ପରମ ବୈଷ୍ଣବୀ।।

ରସହୀନ ରସା ଦିଅ ମା’ଭରସା

ତୋର ଆଗମନ ଚାହିଁ ଚାହିଁ;

ଅନେକ ଦିନରୁ କରିଛି ମୁଁ ଆଶା

ସେ ଆଶା ପୁରଣ ହେବାପାଇଁ;

ମନେ ଭରି ମୋ ବିଶ୍ୱାସ;

ହେ ଦେବୀ ତୁମେ ପରମ ବୈଷ୍ଣବୀ।।

ନାରୀ ନିର୍ଯାତନା ମରେ ଶିଶୁ କନ୍ୟା

ଅତ୍ୟାଚାର ଅନ୍ୟାୟର ଦାଉ;

ସହି ହେଉନାହିଁ କରୁଛି ବନ୍ଦନା

ଆସ ବେଗେ ବେଳ ନାହିଁ ଆଉ;

ଚାହିଁଛି (ତୋ) ଆସିବା ପଥ;

ହେ ଦେବୀ ତୁମେ ପରମ ବୈଷ୍ଣବୀ।।

ଭରସା ତୁଟିବା ଆଗରୁ ମୋ ଆଶା

ପୁରଣ କରିବୁ ମହାମାୟୀ;

କଣ୍ଠରୁଦ୍ଧ ମୋର ସ୍ଫୁରୁନାହିଁ ଭାଷା

ଧ୍ୟାନ ମୁଁ କରୁଛି ତୋତେ ଧ୍ୟାଇ;

ନକରିବୁ ମା’ ନିରାଶ;

ହେ ଦେବୀ ତୁମେ ପରମ ବୈଷ୍ଣବୀ।।