ହୃଦପଲ୍ଲଵ
ହୃଦପଲ୍ଲଵ
ତୋ ହୃଦ ପଲ୍ଲଵ କରିଦେ କାଳିଆ
ହୃଦୟରେ ଝୁଲୁଥିବି
ଅନ୍ତର ମଧ୍ୟରୁ ପ୍ରୀତିମୟୀ ରାଧା
ନାମକୁ ମୁଁ ଶୁଣୁଥିବି ।
ନାକେ ନାକଚଣା କରିଦେବୁ ଯଦି
ଧନ୍ୟ ମୁହିଁ ହୋଇଯିବି
ତୋ କଳା ମୁଖର ଆହୁରି ସୌନ୍ଦର୍ଯ୍ୟ
ବଢ଼ାଇ ମୁଁ ଦେଉଥିବି ।
କରରେ ନାହିଁବୁ କରପଲ୍ଲଵ ତୁ
ବାହୁରେ ତୋ ଲାଖିଯିବି
ଅୟୁତ ଯୁଗର ପିପାସା ମୋହର
ତୋତେ ମୁଁ ଜଡ଼ାଇନେବି ।
ଫୁଲ ରସିଆ ତୁ ଫୁଲହାର ହୋଇ
ଗଳାରେ ତୋ ଲମ୍ବୀଯିବି
କହିପାରୁ ନାହିଁ ମନ କଥା ମୋର
ଚୁପି ଚୁପି କହିଦେବି ।
ବାସ ଚନ୍ଦନ ମୁଁ ହୋଇଲେ କାଳିଆ
ତୋ ସେବାରେ ଲାଗୁଥିବି
ସର୍ବାଙ୍ଗେ ଶୀତଳ ପରଷ ଦେଇ ମୁଁ
ଶ୍ରମ ଲାଘବ କରିବି ।
ତୁଳସୀ କରିବୁ ଦୟଣା କରିବୁ
ତୋ ଇଛାକୁ ମାନିନେବି
ଯାହା ତୁ କରିବୁ ପାଖରେ ରଖିବୁ
ନିତି ତୋତେ ଦେଖୁଥିବି ।
ଶିଳା ଖଣ୍ଡେ ଯଦି କରିବୁ କାଳିଆ
ବାଇଶି ପାହାଚେ ଥିବି
ଭକତ ତୁଣ୍ଡରୁ ତୋ ନାମ କୀର୍ତ୍ତନ
ସଦା ମୁହିଁ ଶୁଣୁଥିବି ।
ଦୀପଟିଏ ଯଦି କରିବୁ ଧନରେ
ତୋ ପାଶରେ ଜଳୁଥିବି
ନିଜେ ଜଳି ଜଳି ଆଲୋକ ଦେଖାଇ
ତୋ ମୁହଁକୁ ନିରେଖିବି ।
ଖଣ୍ଡୁଆ ପାଟଟି କରିଦେବୁ ଯଦି
ଗୀତଗୋବିନ୍ଦ ଲେଖିବି
ତୋର ଅଙ୍ଗ ସଙ୍ଗ ଲାଭକରି ପ୍ରଭୁ
ବଡ଼ ସିଂହାର ଦେଖିବି ।
ଟିକି ଚଢେଇଟେ ଯଦି କରିଦେବୁ
କୋଇଲି ବୈକୁଣ୍ଠେ ଥିବି
ତୁଳସୀ ବଣରେ ମନ ଆନନ୍ଦରେ
ତୋ ନାମକୁ ଗାଉଥିବି ।