କହିବାକୁ ଲାଗେ ଲାଜ
କହିବାକୁ ଲାଗେ ଲାଜ
ପ୍ରିୟ ସଜନୀ, କହିବାକୁ ଲାଗେ ଲାଜ ଲୋ
ପାରା ଛୁଆଟିର ପର ଲାଗୁ ଲାଗୁ
ଭାବୁଛି ନିଜକୁ ବାଜ ଲୋ, ପ୍ରିୟ ସଜନୀ(ଘୋଷା )
ମାଟିମାର୍ଜାରଟା ଛାତି ଫୁଲାଉଛି
ହେବାପାଇଁ ଅହିରାଜ
ମୟୂର ହେବାକୁ ମନେ ବିଚାରିକି
କୁକୁଟ ଟେକୁଛି ଲାଞ୍ଜ ଲୋ,ପ୍ରିୟ ସଜନୀ ।
ବାମନ ହୋଇକି ଗଗନର ଶଶୀ
ହାତେ ଧରିବାକୁ ସଜ
ନଖ ବାଳ ରଖି ଭାଲୁ ବିଚାରୁଛି
ହୋଇଯିବ ଯତିରାଜ ଲୋ, ପ୍ରିୟ ସଜନୀ ।
ଛେଳି ଜଗା ପିଲା ନୋଳି ପିନ୍ଧିଲେଣି
ଗାୟକକୁ ସଜବାଜ
ବଚ ଖାଇ ପେଚା କଣ୍ଠ ସଜାଉଛି
ପିକ ବଜାଇବ ଝାଞ୍ଜ ଲୋ ପ୍ରିୟ ସଜନୀ ।
ତୁଳସୀ ପାଖରେ ଖଡ଼ା ଗଛ ଥାଇ
ଭାବୁଛି ହୋଇବ ପୂଜ୍ୟ
ଭାଷେ ଜଗନ୍ନାଥ ଖଦ୍ୟୋତ ଚେଷ୍ଟିତ
ହେବାପାଇଁ ଦିନରାଜ ଲୋ, ପ୍ରିୟ ସଜନୀ ।