ଲକ୍ଷ୍ମୀଙ୍କ ବିରୁଦ୍ଧରେ ମନ୍ତ୍ରଣା
ଲକ୍ଷ୍ମୀଙ୍କ ବିରୁଦ୍ଧରେ ମନ୍ତ୍ରଣା
ଶ୍ରୀକ୍ଷେତ୍ରରେ ଏବେ ଲୀଳା ଚାଲିଅଛି
ପ୍ରଭୁଙ୍କର ଅଣସର l
କାଳିଆ ଶୋଇଛି କବାଟ କିଳିକି
ଆସିଅଛି ଭାଲୁ ଜର ll
ଲକ୍ଷ୍ମୀ ମାଆଙ୍କର ହୋଇଅଛି ଏବେ
ଗ୍ରୀଷମରେ ଗ୍ରୀଷ୍ମ ଛୁଟି l
ଷାଠିଏ ପଉଟି ଅନ୍ନ ରାନ୍ଧଣାରୁ
ମିଳିଅଛି ଅବ୍ୟାହତି ll
ମହାଲକ୍ଷ୍ମୀ ଦିନ ଆନନ୍ଦେ କାଟନ୍ତି
ରୋଷରେ ନ ଜଳେ ଚୁଲି l
ଦିନ ହରୁଥାନ୍ତି ବିମଳାଙ୍କ ସଙ୍ଗେ
ଖେଳି ଲୁଡୁ ପଶା ପାଲି ll
ସାଥ ଦେଉଥାନ୍ତି ମାଆ ସରସ୍ବତୀ
କେବେ କେବେ ବେଢ଼ାକାଳି l
ଖେଳର ହିସାବ ଗଣେଶ ରଖନ୍ତି
ପୋଥି ବଟମୂଳେ ଖୋଲି ll
ଅଣସରେ ବସି କପଟି କାଳିଆ
କରୁଅଛି କଳପନା l
ବଳିଆ ଭାଈର ସଙ୍ଗତେ ସୁଭଦ୍ରା
ଚାଲିଛି ଗୁପ୍ତ ମନ୍ତ୍ରଣା ll
ଶୁଣ ବଡ଼ ଭାଈ ଶୁଣ ଲୋ ସୁଭଦ୍ରେ
ମୋହର ଭଉଣୀ ଗେହ୍ଲି l
ଅଣସରୁ ଆମ୍ଭେ ବାହାରି ଚାଲିବା
ମାଉସୀମା ଘର ବୁଲି ll
ଭାଉଜକୁ ତୋର ସଙ୍ଗେ ନେବାନାହିଁ
ଭକ୍ତେ ଦେବେ ଭାରି ଗାଳି l
କଳିହୁଡ଼ି ସେଟା ଭାରି ଅସୁନ୍ଦରି
ଟେରି ବେଢ଼ାଦାନ୍ତି କାଳି ll
ପେଚାଟିଏ ବସି ଗମ୍ଭୀରା ଗୁମୁଟେ
କାଳିଆ କଥା ଶୁଣିଲା l
ମାଆଙ୍କ ପାଶରେ ବଖାଣି ବସିଲା
ପ୍ରଭୁଙ୍କ କପଟ ଲୀଳା ll
ଲକ୍ଷ୍ମୀ ଠାକୁରାଣୀ ଜଗତ ଜନନୀ
କୋପ କଲେ କ୍ଷଣ କୋପା l
କାଳିଆ ତୋହର କଛାକୁ ଖୋଲିବି
ରଖିବ ତୋ କେଉଁ ବୋପା ll
ଧନ୍ୟ ମହାପ୍ରଭୁ ଧନ୍ୟ ତୋର ଲୀଳା
ଜଗତରେ ଦେଉ ଶିକ୍ଷା l
ଦାମ୍ପତ୍ୟ ଜୀବନ ହସ ରସ ଭରା
ସ୍ନେହ ପ୍ରେମ ଓ ପ୍ରତୀକ୍ଷା ll