ନୀଳାଦ୍ରି ମଣି
ନୀଳାଦ୍ରି ମଣି
ନୀଳ ଓ ଅଦ୍ରି ରୂପରେ ଜଗନ୍ନାଥ
ସ୍ୱୟଂ ନୀଳ ପୁଣି ଅଦ୍ରି
ନୀଳ ସହିତ ପର୍ବତ-ମେଘ-ବୃକ୍ଷ
ଏକାଧାରରେ ନୀଳାଦ୍ରି ।
ନୀଳ ପର୍ବତରେ ନୀଳ ମେଘ ତୁଲ୍ୟ
ଉଦିତ ସେ' ଜଗନ୍ନାଥ
ଭକ୍ତର କାମନା କଳ୍ପ ବୃକ୍ଷ ସମ
ସାକ୍ଷାତରେ ଉଦ୍ଭାସିତ ।
ବ୍ରହ୍ମାଣ୍ଡର ସୃଷ୍ଟି ସ୍ଥିତି ଲୟ ସହ
ନିଗ୍ରହ ଅନୁଗ୍ରହର
ଏକମାତ୍ର ହେତୁ ସ୍ୱୟଂ ଜଗନ୍ନାଥ
ଆଦରଣୀୟ ଭକ୍ତର ।
ନୀଳ ସମୁଦ୍ରର ଗାମ୍ଭିର୍ଯ୍ୟ- ଔଦାର୍ଯ୍ୟ
ରୂପ ସହଜେ ପ୍ରତ୍ୟୟ
ପୁଣି ଜଳ ସ୍ରୋତ ର ରସ ଗ୍ରହଣରେ
ରସିକ ଭାବ ଉଦୟ ।
ମହାପ୍ରଭୁ ନୀଳ ସମୁଦ୍ର ସମାନ
ରସିକ ପୁଣି ଉଦାର
ପ୍ରଭୁଙ୍କର ମହା ବାକ୍ୟ ଜ୍ଞାନ ବ୍ରହ୍ମ
ପ୍ରଭୁ ଧିର ଓ ଗମ୍ଭୀର ।
ଶ୍ରୀଜଗନ୍ନାଥ କଳ୍ପବଟ ସ୍ବରୂପ
ସ୍ଵୟଂ ନୀଳମଣି ନାମେ
ନୀଳ ପୁଣି ଅନ୍ୟ ଅର୍ଥେ ବଟ ବୃକ୍ଷ
ନୀଳ ଶବ୍ଦ ଅର୍ଥ କ୍ରମେ ।
ଅଦ୍ରି ଅର୍ଥ ହିଁ ପର୍ବତ ସହଜରେ
ପ୍ରଭୁ ବିଜେ ପର୍ବତରେ
ନୀଳ ପର୍ବତରେ ହିଁ ଉଦୀୟମାନ
ପୁଣ୍ୟ ଶ୍ରୀକ୍ଷେତ୍ର ଧାମରେ ।
ପ୍ରଭୁ ସ୍ୱୟଂ ନବ ମେଘ ତୁଲ୍ୟ କଳା
ଅଦ୍ରି ଅନ୍ୟ ଅର୍ଥେ ମେଘ
ଶ୍ରୀମୁଖ କୁ କଳା କରି କଳି କାଳେ
ସତେ ଅବା କଳା ମେଘ ।
ଦକ୍ଷିଣ ଚକ୍ଷୁ ଓ ସୁଦର୍ଶନ ଚକ୍ର
ସୂର୍ଯ୍ୟଙ୍କ ପ୍ରତୀକ ସମ
ସୂର୍ଯ୍ୟ ପୂଜା ପ୍ରତିଦିନ ସମ୍ପାଦନ
ଅଦ୍ରି ଅର୍ଥ ସୂର୍ଯ୍ୟ ସମ ।
ସାତ ଅଙ୍କ ସହିତ ସପ୍ତାବରଣ
ବେଦୀରେ ସାତ ବିଗ୍ରହ
ସୂର୍ଯ୍ୟଙ୍କ କିରଣରେ ସାତ ରଙ୍ଗର
ଅଦ୍ରି ଅର୍ଥ ସମନ୍ଵୟ ।
ମଣି ଖଚିତ ରତ୍ନ ସିଂହାସନ ରେ
ନୀଳାଦ୍ରି ମଣି ଉଦ୍ରେକ
ସେହି ନୀଳାଦ୍ରିମଣିଙ୍କୁ ପ୍ରଣିପାତ
ଭକ୍ତି ବିଶ୍ଵାସ ପୂର୍ବକ ।