ନିର୍ମାଲ୍ୟ ଦେବ ମୁହଁରେ

କିଏ ତତେ ଡାକେ ହରି ହରି ବୋଲି

କିଏପୁଣି ଡାକେ ହର

ମୋପାଇଁ ଥିଲୁ ତୁ ଜୀବନ୍ତ ଠାକୁର

ଆଜି ଲାଗୁଛୁ ପଥର ।

ଦିନେ ତତେ ପ୍ରଭୁ ମାଗି ମୁଁ ନଥିଲି

ଧନ ଦଉଲତ ବଇଭବ

ମାଗିଥିଲି ତୋର କରୁଣା ଟିକିଏ

ଆଉଟିକେ ଆଶିର୍ବାଦ ।

ଭଲ ପୁଅଟିଏ ଦେଇଥିଲୁ ବୋଲି

ଯେବେ ଟେକିଦେଲି ହାତ

ସେହିଦିନ ତାକୁ ବାହୁଡାଇ ନେଇ

ପାଇଲ କିଅବା ଯଶ ।

ସେହି ଦିନଠାରୁ ପଣ ମୁଁ କରିଛି

ଡାକିବିନି କେବେ ଥରେ

ଯେତେ ଦୁଃଖ ଦେବୁ ସହିଯିବି ସବୁ

ଛାତିକୁ କରି ପଥର ।

ଏତିକି ଗୁହାରି ରଖିବ ପ୍ରଭୁହେ

କରିଦିଅ ମୋତେ ପଥର

ଆଉ କାହାପାଇଁ ଜୀବନେ ମୋହର

ନଝରୁ ଲୁହର ଧାର ।

ମୋ ଅନ୍ତିମ କାଳେ ଶୋଇଯିବି ଯେବେ

ଛଅଖଣ୍ଡ କାଠ ଶେଯରେ

ମୋ ପୁଅର ସ୍ଥାନ ନେବ ହୋ ସାଆନ୍ତେ

ନିର୍ମାଲ୍ୟ ଦେବ ମୁହଁରେ ।