🙏ଓଁ ନମଃ ଶିବାୟ 🙏

ସତ୍ୟ ହିଁ ବୋଇଲେ ଶିବ ଶିବ ହିଁ ସୁନ୍ଦର

ଦେବ ଦେବ ମହାଦେବ ଭୋଳା ମହେଶ୍ୱର

ଅନନ୍ତ ସ୍ୱରୂପ ହର ଦିଗମ୍ବର ଗଙ୍ଗାଧର

ଶଶାଙ୍କ ଶେଖର ଜୟ କରିଛ କାମ

ଭଜ ସତ୍ୟମ୍ ଶିବମ୍ ସୁନ୍ଦରମ୍ l

ଜପ ଓଁ ନମଃ ଶିବାୟ ପଞ୍ଚାକ୍ଷର ମନ୍ତ୍ର

ଆଶୁତୋଷ ଅଳପକେ ହୁଅ ହେ ତୃପତ

କୋପେ ତପେ ଦାନ କର ଭକତ ଜନରେ ବର

ଭକତିରେ ବଶ ହୁଅ ଭଜିଲେ ନାମ

ଭଜ ସତ୍ୟମ୍ ଶିବାମ୍ ସୁନ୍ଦରମ୍ l

କାଳ ପରେ ମହାକାଳ ହେ ପାର୍ବତୀ ପତି

ପିନାକୀ ଧାରକ ପଶୁପତି ମହାଯତି

ଶ୍ମଶାନ ନିବାସୀ ତ୍ରିପୁରାରୀ ନାଶ ଦେବ ରିପୁ 

ମଙ୍ଗଳ ମୂରତୀ ମହିମାହିଁ ଅସୀମ

ଭଜ ସତ୍ୟମ୍ ଶିବମ୍ ସୁନ୍ଦରମ୍ l

ପଞ୍ଚାନନ ତ୍ରିଲୋଚନ କଇଳାସ ବାସୀ

ଅଘୋରୀ ନାୟକ ଭୂତ ପତି ଶୂଳୀ କାଶୀ

ନଟରାଜ ଭୟଙ୍କର ପ୍ରଳୟ ନର୍ତ୍ତନ କର

ଜଟି ଧୂର୍ଜଟି ବିଭୁତି ଅଙ୍ଗେ ସୁଷମ

ଭଜ ସତ୍ୟମ୍ ଶିବମ୍ ସୁନ୍ଦରମ୍ l

ବୃଷଭ ଆରୁଢ଼ ବିଶ୍ୱନାଥ ଲୋକନାଥ

ଚରଣେ ଶରଣ ପ୍ରଭୁ ଉଦ୍ଧାର ଅନାଥ

ଗୀତେ କହେ ପ୍ରେମାନନ୍ଦ ତାଣ୍ଡବ ନୃତ୍ୟେ ଆନନ୍ଦ

ଯାଉ ଏ ଜୀବନ ଧରି ଶିବାୟ ନମଃ

ଭଜ ସତ୍ୟମ୍ ଶିବମ୍ ସୁନ୍ଦରମ୍ l