ସମୟ ମୋ ସାଥେ ଖେଳେ ଚକାଭଉଁରୀ
ସମୟ ମୋ ସାଥେ ଖେଳେ ଚକାଭଉଁରୀ
ସମୟ ମୋ ସାଥେ ଖେଳେ ଚକା ଭଉଁରୀ
ତା ପଛରେ ଧାଇଁ ମଥା ଯାଉଛି ଘୂରି
ଯେ ଡାଳ ଧରୁଛି ଯାଇ
ସେ ଡାଳ ଛିଣ୍ଡି ପଡ଼ଇ
ଶ୍ରାବଣରେ ପଡ଼ୁନାହିଁ ବରଷା ବାରି
ସମୟ ମୋ ସାଥେ ଖେଳେ ଚକା ଭଉଁରୀ |
ଉଜାଣି ବହିଲା ପୁଣି ଯମୁନା ନଈ
ଦୁଇ କୂଳ ତାଡ଼ି ବାସ ନେଲା ଭସାଇ
ହରାଇଲି ପିତାମାତା
ହୋଇଲି ଭାରି ହୀନସ୍ଥା
ପଢ଼େ ପାଠ କରି କଷ୍ଟ ପେଟକୁ ମାରି
ସମୟ ମୋ ସାଥେ ଖେଳେ ଚକା ଭଉଁରୀ |
ଭଲ ପାଇଲି ଯାହାକୁ ଜୀବନ ଦେଇ
ଚାଲିଗଲା ଅଧାରୁ ସେ ମୁହଁ ଫେରେଇ
ଭାଗ୍ୟ କରେ ଉପହାସ
ଦାରିଦ୍ର୍ୟ ମୋ ଗଳେ ଫାଶ
ବାର ଦ୍ୱାର ବୁଲେ ଚିନ୍ତା ଜଳେ ପହଁରି
ସମୟ ମୋ ସାଥେ ଖେଳେ ଚକା ଭଉଁରୀ |
ଏକା ପାଠ ପଢ଼ି ଏକା ତାଲିମ ସାରି
ବିକାଶ କଲା ଚାକିରୀ ମୁଁ ତ ବେକାରୀ
ସୁନା କ୍ଷେତ ଉଜୁଡ଼ିଲା
ବାତ୍ୟା ବି ତାଣ୍ଡବ କଲା
ଗୁଣ୍ଡେ ଖାଏ ଦଣ୍ଡେ ଜିଏଁ କର୍ମ ଆଦରି
ସମୟ ମୋ ସାଥେ ଖେଳେ ଚକା ଭଉଁରୀ |