ସଂପର୍କ
ସଂପର୍କ
ସଭିଏଁ ଏଠି ସଂପର୍କରେ ବନ୍ଧା
ସେ ହୋଇଥାଉ ଜନ୍ମରୁ ରକ୍ତଗତ
ଅବା ମାନସିକତାରେ ଭାବ ଭକ୍ତିଗତ
ମାଆଠାରୁ ପରମାତ୍ମା ପର୍ଯ୍ୟନ୍ତ
ପରିବାରଠାରୁ ବିଶ୍ବ ବ୍ରହ୍ମାଣ୍ଡ ଯାକ
ଅଦୃଶ୍ୟ ଭାବରେ ଆମେ ସମସ୍ତେ
ଏକ ଆଧାରରେ ହୋଇଛୁ ସଂଯୁକ୍ତ
ସଂପର୍କର ଅର୍ଥ ଅତି ବ୍ୟାପକ
ଜନ୍ମରୁ ମୃତ୍ୟୁ ଯାଏଁ ଜନ୍ମ ଜନ୍ମାନ୍ତର
ସଂପର୍କକୁ ଛାଡି ପାର୍ଥିବ ଜୀବନ
ଏକା ଏକା ନିର୍ବାହ କରିବା ଅସମ୍ଭବ
ମଣିଷ ସାଥେ ଉଦ୍ଭିଦଜଗତ
କୀଟ ପତଙ୍ଗ ଜୀବଜନ୍ତୁ ସାରା ପ୍ରକୃତି
ପଞ୍ଚଭୂତ ଆତ୍ମା ପରମାତ୍ମା ସବୁ
ଇହଲୋକରୁ ପରଲୋକ
ପ୍ରତିଟି ଜୀବନ ହୋଇଥାଏ ନିର୍ଭରଶୀଳ
ବ୍ୟକ୍ତିଗତଠାରୁ ସାମୂହିକଭାବେ
ଏକ ବନ୍ଧନରେ ଆମେ ସବୁ ଆବଦ୍ଧ
ଦୃଢ଼ ଧାରଣାରେ ହେଉ ନିକଟତମ
ହୀନ ସଂକୀର୍ଣ୍ଣତାରେ ହୁଏ ବ୍ୟତିକ୍ରମ
ତଥାପି ଏ ସଂପର୍କ ହୁଏନା ଛିହ୍ନ
ପ୍ରତ୍ୟକ୍ଷ ବା ପରୋକ୍ଷରେ
ହୋଇଥାଏ ଜଣେ ତାର ଅନୁଗତ
ଉଗ୍ର ଦାମ୍ଭିକତାର ଅହଂଭାବରେ
ଅବା ଅଜ୍ଞାନତାର ଘନ ଅନ୍ଧାରରେ
ହୁଏତ କରି ପାରେ ଜଣେ ଅସ୍ବୀକାର
କିନ୍ତୁ ବାସ୍ତବରେ ପାରେ ନାହିଁ
ଏ ସଂପର୍କକୁ ଛାଡି଼ ସ୍ଥୂଳ କି ସୂକ୍ଷ୍ମରେ
ଜୀବନ ସହିତ ଶ୍ବାସ ପ୍ରଶ୍ବାସ ଭଳି
ଅଜଣାତରେ ବି ରହିଥାଏ ଏ ସଂପର୍କ
ବିଧିର ବିଧାନ ଏକାନ୍ତରେ ଥାଏ ଧରି
କାହାକୁ ଠକି ଦେବା ପ୍ରତାରିତ କରିବା
ସାମୟିକ ସ୍ବାର୍ଥର ବିଭ୍ରାନ୍ତିରେ ଜଣେ
ଉର୍ଦ୍ଧମୁଖୀ ନ ହୋଇ ପତନକୁ ଗତି
କରିଥାଏ ଲୋଭ ମୋହରେ
ସଂପର୍କ କେବଳ ବିକାଶ ପ୍ରକାଶ ଲାଗି
ବାଧାପ୍ରାପ୍ତ ହେବା ନିଜସ୍ବ ବିଡ଼ମ୍ଵନା
ମିଥ୍ୟାଚାର ପ୍ରବଞ୍ଚନା ମାତ୍ର
ସଂପର୍କର ଲକ୍ଷ୍ୟ ଉଦ୍ଦେଶ୍ୟ ମହତ
ସତ୍ୟ ଆଡ଼କୁ ତାର ଗତି ପ୍ରଗତି
'ବସୁଧୈବଃ କୁଟୁମ୍ବକମ୍' ଚିନ୍ତାଧାରା
ସଂପର୍କକୁ କରେ ମହନୀୟ
ତାର ବିନିମୟରେ ସାରା ଜଗତକୁ
ପବିତ୍ରତାରେ କରିପାରେ ଜଣେ ଜୟ ।