ଯାହା ଲୁଚି ଅଛି
ଯାହା ଲୁଚି ଅଛି
ପିଲାଦିନ ବନ୍ଧୁ ଭାବ ଦିଆନିଆ
ମନରେ ଅଛି ରହିବ
କେତେ କେତେ କଥା ସ୍ମୃତି ହୋଇ ଅଛି
ଭୁଲିବା ବି ଅସମ୍ଭବ
ମନ ଖୋଲି କହିଥିଲି ସବୁକଥା
ଖୁସି ଥିଲା ସେ ସମୟ
ଜୀବନରେ ଗତିପଥ ବଦଳାଇ
ନିଜେ ଆଜି ଅସହାୟ
ହାତରେ ହାତ ମିଶାଇ ପରଷ୍ପର
ଯେବେ ବାଟ ଚାଲୁ ଥିଲେ
ଆମ ସମ୍ପର୍କର ଚର୍ଚ୍ଚା ହେଉଥିଲା
ଦୁହିଁଙ୍କୁ ପାଖେ ଦେଖିଲେ
ସକାଳର ନିଦ ଭାଙ୍ଗିଗଲା ପରେ
ଦେଖିବାକୁ ତୁମ ଛବି
ହୃଦୟର ଆବେଗତା ବଢୁଥିଲା
କେମିତି ଶୀଘ୍ର ଦେଖିବି
କିଛି କଥା ବାର୍ତ୍ତା ହେଉ ବା ନ ହେଉ
ଦେଖାହେଲେ ମନ ଶାନ୍ତ
ସକାଳ ଆରମ୍ଭ ସେହି ଶାନ୍ତି ସହ
ଦିନ ସାରା ଚିନ୍ତା ମୁକ୍ତ
ଅଚାନକ ଝଡ ସୃଷ୍ଟି ହେଲା ପରି
ସମ୍ପର୍କରେ ହେଲା ଫାଟ
କିଛି ବୁଝିବା ଆଗରୁ କହି ଥିଲ
ଆଉ ଚାହଁ ନାହିଁ ବାଟ
ଡେରି ହେଲେ ସୁଦ୍ଧା ବୁଝି ହୋଇଗଲା
ତୁମର ନୂଆ ଠିକଣା
ଚାଲିଯିବ ଆଉ ଅଳ୍ପ ଦିନ ପରେ
ଜାଣିବା ପାଇଁ ଅଜଣା
ଅଜଣା କୁ ଆପଣେଇ ନେଇ ଥିଲ
ଜଣା ମୁଁ ହେଲି ଅଜଣା
ତୁମ ଜଣା ଶୁଣା ତୁମ ପରି ଚାଲି
ପାଇଛି ଏକ ଅଜଣା
ଅଜଣା କୁ ଜାଣି ଜାଣି ଆପଣେଇ
ନିଜକୁ ନିଜେ ଅଜଣା
ଅଜଣା ରହସ୍ୟ ରହିଛି ଅଜଣା
ବୁଦ୍ଧି ହୁଏ ବାଟବଣା
ପିଲାଦିନୁ ଜଣାଶୁଣା ଥିଲା ଯିଏ
ଯେବେ ହୋଇଛି ଅଜଣା
ଅଜଣା ସହିତ ଜାଣି ହେଉ ନାହିଁ
ନିଜେ ନା ସିଏ ଅଜଣା!
ଯେହେତୁ କିଛି ଲୁଚାଇନି ତୁମକୁ
ଖୋଲାଖୋଲି ପିଲା ବେଳୁ
କହି ଏହି ଜଣା ଅଜଣା ରହସ୍ୟ
କିଛି ଆଶ୍ଵସନା ମିଳୁ ।