ମନେପଡେ ପିଲାଦିନ
ମନେପଡେ ପିଲାଦିନ
ପାହାଡ ଫାଙ୍କରେ ସକାଳ ସୂରୁଜ
ବିଞ୍ଚୁଥିଲା ଦିନେ ରଙ୍ଗର ମୁରୁଜ
କାକର ବିନ୍ଦୁରେ ଯେବେ ପଡୁଥିଲା
ସୁନେଲି କିରଣ ସୂର୍ଯ୍ୟର
ଚିକିମିକି କରୁଥିଲା ସାରା ଘାସ
ସତେ ଅବା ଚମକ ଅଟେ ହୀରାର
ଗୋବର ଲିପା ଖଳାରେ ପଖାଳ
ସାଙ୍ଗେ ବଡି ଚୁରା , ବାଇଗଣ ଶାଗଭଜା
ଖାଇଛି ଯିଏ ପାଇଛି ସିନା ତାର ମଜା
ବୋହୁବୋହୁକା ଖେଳ ପୁଣି ମିଛି ମିଛିକା
କଡେଇରେ ଭାତ ତରକାରୀ ରନ୍ଧା
ନ ଖାଇଲେ ମାମୁଁଘର ପୋଡ଼ିବାର ଡର
ରାଜାରାଣୀ ଚୋରପୁଲିସ ଛକିଶୂନ କିତିକିତି
ବାଡି଼ଡିଆଁ ବୋହୁଚୋରି ଖେଳ
ଲାଗୁଥିଲା ମଜା ଯେବେ ପୁଣି
ଗାଁ ଦାଣ୍ଡେ ହେଉଥିଲେ ପିଲାମାନେ ମେଳ
ସାରୁ ପତ୍ରେ ଧରୁ ଥିଲେ କେତେ କଙ୍କି
ଧରୁଥିଲେ ଲୁଚି ପ୍ରଜାପ୍ରତି
ବର୍ଷା ହେଲେ କାଗଜର ଡଙ୍ଗା
ଓଳି ପାଣି ପୁଣି ଓଦା ଅଧା ଅଧା
ଖରା ବେଳେ ଘର ଲୋକ ସୋଇ ଗଲା ପରେ
ଲୁଚି ଲୁଚି ଧୀରେ ଯାଇ ଆମ୍ବ ଗଛ ମୂଳେ
କଞ୍ଚା ଆମ୍ବ ଲଙ୍କା ଲୁଣ ତେନ୍ତୁଳିର ପାଣି
ସାଙ୍ଗ ହେଉଥିଲେ କେତେ ପୁଣି କରୁଥିଲେ କଳି।