అలా ఎలా వెళ్ళిపోతావ్
అలా ఎలా వెళ్ళిపోతావ్
ఒక్క మాట చెప్పకుండా
చివరి కౌగిలి ఇవ్వకుండా
నా నుదిటిపై ముద్దు పెట్టకుండా
అసలేం జరిగిందో అర్థమయ్యేటట్లు వివరించకుండా
నా పరిస్థితి ఏంటో విచారించకుండా
మాటల్ని పూర్తి చేయకుండా
నీ శ్వాసకు ఆధారం నా చిరునవ్వయితే
నీ ఉనికికి ఆలంబన నా ఆలోచనలయితే
నీ ప్రాణం నా దగ్గర ఉంటే
నువ్వు చేసిన బాసలన్నీ నిజమయితే
అలా ఎలా వెళ్ళిపోతావ్
ఎక్కడికి వెళుతున్నావో తెలీకుండా
ఎప్పటికీ రావని స్పష్టం అయ్యేలా
అలా ఎలా వెళ్ళిపోతావ్
ఎంత ధైర్యం నీకు
వికసించిన నా ధైర్యం చిదిమేసేలా
విలక్షణమైన లక్ష్యాలు చెరిగిపోయేలా
నీటి మీద రాతలా
మన ప్రేమనెలా చెరిపేస్తావ్
నన్నెలా వదిలేస్తావ్
అలా ఎలా వెళ్ళిపోతావ్