తప్పేనా
తప్పేనా
నీ హృదిలో చోటుకాస్త..ఆశించుట తప్పేనా..!
నీ ప్రేమకు దాసుడనే..కరుణించుట తప్పేనా..!
మనసివ్వగ తెలియలేదు..రహస్యమే వివరించవు..
ఎదురుచూపు అడవిలోన..విహరించుట తప్పేనా..!
ఏ కోకిల రాగానికి..అందేనో నా వేదన..
మధురమైన చిత్రహింస..భరియించుట తప్పేనా..!
నిదురరాని కన్నులుండి..లాభమేమి ఈ జన్మకు..
కనుపాపల నిట్టూర్పులు..రగిలించుట తప్పేనా..!
అంతులేని మోహముతో..సమరమెంత సౌఖ్యమోయి..
ఈ జీవన గంధాలకు..స్పందించుట తప్పేనా..!
నీ అందెల సవ్వడిలో..మౌనవేద నాదాలే..
వింటూనే నీ గజలై..ప్రవహించుట తప్పేనా..!