మెరిసే తారకలు
మెరిసే తారకలు
కదిలిపోయే నీరు కాదు కొన్ని జ్ఞాపకాలు
అలా మెరిసి మనసు మురిపించే తారకలు
బుద్ధిగా తయారు అయ్యి
బడికి వెళ్తుంటే , వెనక్కు పిలిచి
అమ్మ నుదిటి మీద ముద్దు పెడితే
అదే రోజు ఆమె పరలోకాలకు వెళ్ళిపోయినా
ఆ ముద్దు మాత్రం ముద్రగా నిలిచిపోతుంది కదూ
కనిపించక పోయినా నుదుటి మీద!
నిండుగా దట్టంగా మబ్బులు కమ్ముకున్న నిశి రేయి
చటుక్కున చందమామ కనిపిస్తే
ఆ దృశ్యం అలా నిలిచిపోదూ ఎప్పటికీ !
అనుకోకుండా బజారులో అప్పటి
' మమత ' కనిపించి
ఆ రోజుల్లో నువ్వంటే నాకూ ఇష్టం ఉండేది..ప్చ్
అని అంటే,
మరి మరిచి పోగలమా ఆ ఘడియను !
చాలా పేరున్న పేద్ద రచయిత ఒకరు తారసపడి
" బాగా రాస్తావోయ్ నువ్వు " అని భుజం తట్టిన రోజు
తలుచుకోని రోజంటూ ఉంటుందా ఇక !
పరుగు పందెం అయిన జీవిత సరళిలో
పడక్కుర్చీలో కూర్చుని తీరిగ్గా కాఫీ ఆస్వాదిస్తూ
ఏదో గుర్తుకు వచ్చి చిన్నగా నవ్వుకుంటే
పక్కనే ఉన్న బెటర్ హాఫ్ ' ఏమిటీ ' అని అడిగితే
నిజం అయినా కాకపోయినా
" మనం ఒక్కటైన మొదటి రోజు గుర్తుకు వచ్చి ' అంటే
ఇక కొద్ది రోజులు రోజూ పండగేగా !
..... ,
మబ్బులు వస్తూ ఉంటాయి , పోతూ ఉంటాయి
మధుర స్మృతుల మెరిసే తారకలను మాత్రం
పదిలంగా నిక్షిప్తం చేసుకో మిత్రమా ,
పోతూ పోతూ నవ్వుతూ పోవచ్చు !