સપના
સપના
માણસને જીવવા માટે જોઇએ છે સપનાં,
સાચાં-ખોટાં –સારા-નરસાં.
ચેતનાને ખખડધજ શરીરમાં ઓતપ્રોત કરીને,
હોઠ વિના પણ હસવા સપના જોઇએ.
શબ્દથી શબ્દને ઊતરડીને પણ,
સપનામાં મસાલો ભરવો પડે.
અજાણ બનીને પણ જ્યાં ઘસડે સપનાં,
તિખ્ખો-સુક્કો- ફિક્કો-ઊખડ્યો-ઊબડ્યો.
ગીચ છાતી ઉપર હાથ ફેરવવો પડે,
મોડી રાતનાં – વહેલી સવારનાં સપના.
આંખ સામે ટોળે વળતા અંધારાથી,
અંધારમાંય ના ઓગળતી છાયાઓથી,
ઘેરાયેલાં સપના.
પણ...
હું તો નરી આંખે જોઇ લઉ,
પેલી પટ્ટીની આરપાર અગાધ ખાડીમાં
મને ગમતાં – અણગમતા.
ઊંડું ઊડું તળિયું ધરાવતાં,
સપનાં સાથે ખુલ્લી આંખે રમું છું,
વાયરે વાત ઊડે-કે-ના ઊડે.