કામાક્ષી
કામાક્ષી
વાતાવરણે વર્ષાના આગમનની છડી પોકારી હતી, મયુરનો કેકારવ વાતાવરણને વધુ મદહોશ કરતો હતો, આ મદહોશ વાતાવરણનો આનંદ માણતો મિલાપ ઝરુખે બેઠો બેઠો હતો. અચાનક જ એક જગ્યાએ વિજળી પડી હોય એવો અવાજ સાંભળ્યો સાથે સાથે કોઈની ચીસ પણ સંભળાય છે.
મિલાપે તરત જ ઊભા થઈને જે બાજુથી ચીસ સાંભળી એ તરફ નજર નાંખી. કદાચ જેણે બૂમ પાડી એ દેખાઈ જાય. થોડે દૂર એને એક યુવતી દેખાય છે. કદાચ એણે જ ચીસ પાડી હોઈ શકે એવું મિલાપનું માનવું હતું. થોડી વાર પછી પાછી એની બૂમ સાંભળી એ સાથે જ એ કોઈની સાથે ઝપાઝપી કરતી હોય એવું લાગ્યું. મિલાપ એના પરગજુ સ્વભાવને કારણે તરત જ ઘરમાંથી બહાર દોડી ગયો.
ત્યાં જઈને જોયું તો એક બહુ જ ખૂબસૂરત છોકરી હતી એને જોતાની સાથે જ મિલાપ પ્રથમ નજરે પ્રેમ થયો. એની નજર એ યુવતીને એકટક જોતી હતી. એક શરાબી એ યુવતીનો હાથ પકડવાનો પ્રયત્ન કરતો હતો. એ યુવતી એનો હાથ છોડાવતી હતી. પણ એ શરાબી વારંવાર હાથ પકડવાનો પ્રયત્ન કરતો હતો. મિલાપે ત્યાં જઈને એ યુવતીને એ શરાબીથી છોડાવી. આ જોઈને એ શરાબી એ યુવતીને જેમ ફાવે તેમ બોલવા લાગ્યો. એ યુવતી એ શરાબીને એમ બોલતા રોકતી તો એ તેણીની ઉપર હાથ ઉગામ્યો. મિલાપે એનો હાથ પકડીને એને ધકકો માર્યો. એ સાથે જ શરાબી જમીન પર પડી ગયો અને એને માથામાં ઈજા થઈ. આ જોઈને એ યુવતી એકદમ જ દોડી અને એ શરાબીને ઊભો કર્યો અને ત્યાંથી એને લઈને જતી રહી.
મિલાપ પણ ઘરે પાછો ફર્યો. ઘરે આવીને એણે એની માતાને આ ઘટના વિશે વાત કરી ત્યારે એની માતા બોલી ઉઠી એ તો કામાક્ષી હશે. હમણાં થોડા દિવસ પહેલાં જ આપણા મહોલ્લામાં રહેવા આવી છે અને એ શરાબી એનો પતિ રાકેશ છે. જ્યારે જ્યારે એ શરાબ પીને આવે છે ત્યારે એ કામાક્ષી ઉપર હાથ ઉપાડે છે. એ બંનેના પ્રેમલગ્ન છે. આટલું સાંભળતા જ મિલાપનું દિલ તૂટી ગયું.
હવે રોજ સાંજે એ એના ઘરના ઝરુખે બેસીને કામાક્ષીની એક ઝલક મેળવવા બેસી રહે છે. ખબર છે કશું થવાનું નથી પણ એણે આશા નથી છોડી.