ಈ ಹುಚ್ಚು ಮಳೆಯೆಂದರೆ..!?
ಈ ಹುಚ್ಚು ಮಳೆಯೆಂದರೆ..!?
ಅರಳಿತೊಂದು ಮೊಗ್ಗು ಹೂವಾಗಿ
ಮಳೆಯಲಿ ನೆನೆಯುತಲೆ ನಸುನಕ್ಕು
ತರುಲತೆಗಳಿಗು ಹಿಗ್ಗು ಈ ಹುಚ್ಚು ಮಳೆಯಂದರೆ!!
ಮಾಮರದ ಕೋಗಿಲೆ ಹಾಡೊಂದ ಹಾಡಿತು
ಮನಸುಬಿಚ್ಚಿ ನವಿಲೊಂದು ಕುಣಿಯಿತು
ಪ್ರಾಣಿಪಕ್ಷಿಗು ಪ್ರೇಮ ಈ ಹುಚ್ಚು ಮಳೆಯೆಂದರೆ!!
ಗದ್ದೆಯೊಳಗೆ ನೆಟ್ಟಿ ಮಾಡುವ ಅಜ್ಜಿ
ಜನಪದ ಗೀತೆಯ ಕಟ್ಟಿ ಗುನುಗಿದಳು
ಕೃಷಿಕರಿಗು ಖುಷಿ ಈ ಹುಚ್ಚು ಮಳೆಯೆಂದರೆ!!
ಶಾಲೆಗೆ ರಜ ಮಜವೆಂದು ಮಕ್ಕಳು ನಲಿದರು
ಮೈ ಚಂಡಿ ಆಗುವವರೆಗು ಕೆಸರಲಿ ಬಿದ್ದು ಹೊರಳಿದರು
ಚಿಣ್ಣರಿಗು ಸಂಭ್ರಮ ಈ ಹುಚ್ಚು ಮಳೆಯೆಂದರೆ!!
ಹಾಗೆ ಬಂದು ಹೀಗೆ ಹೋಗುವ ನೆಂಟನಲ್ಲ ಈ ಮಳೆ
ಆರುತಿಂಗಳುಗಳ ಕಾಲ ಇರಲೆಂದೆ ಬಂದ ಖಾಯಂ ಅತಿಥಿ
ಮೌನಿಗಳಿಗು ಮನಸಿಗುಲ್ಲಾಸ ಈ ಹುಚ್ಚು ಮಳೆಯೆಂದರೆ.