हा छंद खास माझा
हा छंद खास माझा
वृत्त:-आनंदकंद
लगावली:- गागालगा, लगागा, गागालगा,लगागा
हा छंद खास माझा आनंद देत आहे ।
बेधुंद या मनाला आकार येत आहे ।।
होतोय का जगाच्या आवाज ओळखीचा ।
याचाच मी जरासा अंदाज घेत आहे ।।
गंधाळल्या तनूची बाला निघून जाता ।
का काळजास कोणी खेचून नेत आहे ।।
काहीच दोष नसता गर्भातल्या कळीचा ।
छाटून टाकण्याचा का खास बेत आहे ।।
आधार या जगाचा राजा बळीच असता ।
खाती लुटून सारे त्याचेच शेत आहे ।।