“कौल कुणाला”
“कौल कुणाला”
लोकसभेचा रणसंग्राम असो की महापालिकेची वारी|
मतांची भिक्षा मागण्यासाठी ते फिरतात दारोदारी|
भूलथापांना यांच्या मी बळी नाही पडणार|
व्यक्तीच कामच महत्वाच ठरणार, नाही पक्षीय बलस्थान|
म्हणूनच सख्यांनो मी करणार मतदान, तुम्ही सुद्धा करा मतदान||
पाण्यासाठी वणवण फिरणारी “ती” कधी कोणाला कळणार?
गारपीटग्रस्त बळीराजा मदतीसाठी किती वाट बघणार?
अजूनही किती “निर्भया” अन्यायाला बळी पडणार?
“कौल मराठी मनाचा” आता सर्वांनाच दिसणार|
आपल्या एका निर्णयाने होईल सरकार गतिमान|
म्हणूनच सख्यांनो मी करणार मतदान, तुम्ही सुद्धा करा मतदान||
ना केशरी महत्वाचा ना निळा| ना लाल महत्वाचा ना हिरवा|
तुम्हा आम्हा सर्वाना हवा विकासाचा रंग बरवा|
असेच सरकार पाहिजे जे जपेल स्त्रियांचा आत्मसन्मान|
म्हणूनच सख्यांनो मी करणार मतदान, तुम्ही सुद्धा करा मतदान||
आघाडी आणि महाआघाडीची बेरीज वजाबाकी|
युती आणि महायुतीची तर एकी कि बेकी|
आपली आपल्याला कळलीच पाहिजे जबाबदारी|
कारण आपल्याच हातात आहे बदल घडवून आणण्याची ताकद खरी|
आपल्याच हक्कासाठी घराबाहेर पडायला नका घेऊ मानापमान|
म्हणूनच सख्यांनो मी करणार मतदान, तुम्ही सुद्धा करा मतदान||