केसांनी कापला गळा
केसांनी कापला गळा
काळयाकुट्ट या केशकुंतलांनी
केला ना ऐन तारुण्यात घात
चंदेरी चमक घेवून अचानक
चमचमले असे भर उजेडात
काळ्याकुंतला आड पांढऱ्याना
लपवण्याचा खेळ झाला सुरु
एक एक म्हणता पिकलं शिवार
पांढऱ्या वादळाला कसं आवरु
डोस्क्याला झाला भलताच ताप
फुकटचा सल्ला कर आता डाय
महिनाभर चमकतं काळकुट्ट डोकं
बुडातल्या पांढर्या रंगाला ना उपाय
वेगवेगळ्या कंपण्यांचे महागडे डाय
वापरुन पाहिलं डायचं नमुनं शंभर
केस झालं पिंजलेल्या कापसावाणी
अन् चष्म्याचा वाढला की हो नंबर
काळ्याचं झालं अचानक असं पांढर
तारुण्यातच या म्हातरपणाच्या खुणा
केसांनीच कापला तारुण्याचा गळा
केसांना लावला जणू शाम्पुने चुना
नाना तेल वापरुन केस ना झाले काळे
केंसावर आता थांबवलाय अत्याचार
पांढर तर पांढर राहू दे या डोक्यावर
मनाशी ठाम केला आता हा विचार
पांढर्याच काळ करता करता
काळपांढरं शिवार सपाट व्हायचं
दुसऱ्यांचं पांढर केस दिसलं की
मनोमनी आपण पण खुश रहायचं
अकाली आलेल्या वृद्धत्व खुणांना
स्वीकारू आपणच मनात म्हणते
जोडीला असावेत अकाली काही वृद्ध
केसांच्या पिकण्याचे समदुःख जाणते