सौ चा नववर्षाचा संकल्प
सौ चा नववर्षाचा संकल्प
नववर्षाचा संकल्प
आमच्या सौ ने केला
उद्यापासून जायचे
उठून सकाळी जॉगिंगला
असं कसं जायचं
जॉगिंगला सूट पाहिजे
चप्पल चालत नाही म्हणे
स्पोर्ट चे बूट पाहिजे
तीन हजाराची बसली
खिशाला चाट
सौ आमची तुडवू लागली
म्युन्सिपाल्टी ची वाट
पण हाय रे दुर्दैवा
रस्त्यात आला खड्डा
हॉस्पिटलचे बिल भरताना
माझ्या पोटात खड्डा
डॉक्टरांचे बिल
झाले पाच हजार
सौ च्या जॉगिंग ने
मी मात्र बेजार
मग आमच्या सौ ने
बैठ्या व्यायामाचा विचार केला
कोणत्यातरी बाबाचा
योगा क्लास लावला
तिथेही एक दिवस
पाठीत भरली उसण
सौ ला भारी पडले
बाबांचे योगासन
मग पुन्हा डॉक्टर
औषधे शेक आणि लेप
सौ च्या व्यायामातून
मी धडा शिकलो एक
एक दिवस पहाटे उठलो
केला सकाळचा चहा
अग मी काय म्हणतोय
जरा इकडे तरी पहा
तूच माझी ऐश्वर्या
तुझी बिपाशाची नजर
अजूनही तुझी
रेखा सारखी फिगर
तुझी एक नजर अजून
करते घायाळ जिगर
मग तुला व्यायामाची काय गरज
लोक हो ही मात्रा मात्र
छान लागू पडली
सौ ची व्यायामाची
आणि माझी डॉक्टरचे
बिल भरण्याची कटकट
एकदमच मिटली