निःशब्द प्रेम

शब्दांनीच केली सुरुवात

भावनांनी मांडले विचार

विचारांच्या भोवऱ्यात गुंतले प्रेम माझे

नजरेत तुझ्या हरवले अस्तित्व माझे

नुसतंच ते नजरेतून झुरणं

शब्दांचं मात्र कागदावरच रेंगाळणं

सुन्या मैफिलीत उठलं होतं वादळ आयुष्याचं

तुझ्या येण्यानं उमगलं मोल माझ्या जगण्याचं

तुझ्याच प्रेमखुणांवर वाट मला सापडली

जगण्याची ही नवी दिशा मज गवसली

प्रेमाला या ना माझ्या रंग ना रूप

कसे बोलावे नि काय सांगावे

काहीच कळेना मनाची ही वेगळीच दशा

तुझ्याच प्रीतीची मी राधा बावरी

ओढ लागे मला तुझ्या भेटीची

तूच सारथी आता माझ्या आयुष्याचा

सांजवेळी दरवळे मनी गंध प्रीतीचा

मिठीत तुझ्या मन माझे मोहरले

स्पर्शात तुझ्या स्वप्न बावरे रंगले

शब्दांच्या पलीकडले हे भावनांचे जग

भावनांच्या जगात विरले निःशब्द प्रेमाचे बोल..