स्वप्न-लोचन
स्वप्न-लोचन
का रे छळशी मला माधवा, रोज रात्री येऊन स्वप्नी
लपवून ठेवीन तुजला कृष्णा , काजळ-काळ्या ह्या नयनी
नको परंतु मेघश्यामा, कसा मावशील तू डोळी
शोधू कशी मी तुला श्यामला, वृंदावनी कातरवेळी
लपवू का मग घननीळा तुज , गालामधल्या खळीमध्ये
दरवळत राहील गंध तुझा मग,कृष्णकमळाच्या कळीमध्ये
काळेकुरळे कुंतल माझे, पांघरशील का तू कृष्णा
कालिंदीच्या तटी श्रीहरी, शमवू चल भेटीची तृष्णा
बाहुपाशी घेशील का रे , मुचकुंदाच्या वृक्ष तळी
सुगंध पांघरून तुझा मुकुंदा, होईन मीही सोनसळी
श्रीरंगा , चल विलीन होऊ, ह्या यमुनेच्या डोहात
नकोच मग ती स्वप्ने लोचनी, जीव होईल नि:शांत !