ଆସୁଛନ୍ତି ରାମଲାଲା
ଆସୁଛନ୍ତି ରାମଲାଲା
କେତେ ଯୁଗ ଅପେକ୍ଷାର ଅନ୍ତପରେ
ରାମଲାଲାଙ୍କ ଆଗମନ
ପ୍ରତିଗୃହେ ପ୍ରଜ୍ଜ୍ଵଳିତ ପ୍ରଦୀପ ଆଲୋକରେ
ହେବ ଅଭିନନ୍ଦନ ।
ପ୍ରକମ୍ପିତ ହେବ ଗଗନ ପବନ
ବିରାଜିବେ ରଘୁକୂଳ ନନ୍ଦନ
ତୃପ୍ତ ହେବ ଦର୍ଶନାଭିଳାଷୀ
କୋଟି କୋଟି ବ୍ୟାକୁଳ ନୟନ ।
ସରଜୁ ନଦୀତୀରେ ଅଯୋଧ୍ୟା ନଗରେ
ଭବ୍ୟମନ୍ଦିର ପ୍ରତିଷ୍ଠା
କୋଟିପ୍ରାଣ ଆଜି ହେବେ ଏକାକାର
ରାମନାମେ ରଖି ଆସ୍ଥା ।
ପ୍ରାଣପ୍ରତିଷ୍ଠା ଉତ୍ସବରେ ସବୁ ଦେବାଦେବୀଙ୍କ
ଶୁଭ ଆଗମନ
ଝଲସିବ ଭାରତବର୍ଷ ନୂତନଢାଞ୍ଚାରେ ଦୀପାବଳି
ହେବ ପାଳନ ।
ରାମରାଜ୍ୟ ଅଭିଳାଷେ ଯୋଗଦେବେ
ବହୁ ସାଧୁସନ୍ଥମୁନୀ
ଶ୍ରଦ୍ଧାଳୁ ଭିଡରେ ଜନ୍ମଭୂମିରେ ଶୁଭିବ
ଜୟ ସୀତାରାମ ଧ୍ୱନି ।
ମୋକ୍ଷ ପ୍ରାପ୍ତି ହେବେ ପାଷାଣୀ ଅହଲ୍ୟା
ତବ ପଦ ସ୍ପର୍ଶ ପାଇ
ଦସ୍ୟୁ ରତ୍ନାକର ବାଲ୍ମିକୀ ହୋଇବେ
ରାମ ନାମ ତୁଣ୍ଡେ ଗାଇ ।
ପତିତଜନଙ୍କୁ ଉଦ୍ଧାରିବେ ମର୍ଯ୍ୟାଦା ପୁରୁଷୋତ୍ତମ
ବିଶ୍ଵବିହାରୀ
ଆଶୀର୍ବାଦ ଭିକ୍ଷାକରି ତବ ପଦଯୁଗଳେ ଭକତ
କରେ ଗୁହାରୀ ।
ମୁକତି ଲଭିଲା ବିଜ୍ଞାନୀ କୈବର୍ତ୍ତ
ପ୍ରଭୁପଦ ପ୍ରକ୍ଷାଳନ କରି
ରାମ ନାମ ଏକା ଜଗତେ ସତ୍ୟ
ଜପି ଭବସାଗରୁ ହେବା ପାରି ।