ଅନ୍ତରାଳେ
ଅନ୍ତରାଳେ
କି ସୁନ୍ଦର ଧରା ଗଢିଛ ହେ ସାଇଁ
ବୃକ୍ଷ ଲତା ବନ ଭୂଇଁ
ନଦ ନଦୀ ଝର ଓ ପ୍ରାଣୀ ଜଗତ
ଅନ୍ତରାଳେ ପ୍ରଭୁ ରହି।।
ସବୁଜ ବନାନୀ ଓ ଶସ୍ୟ କେଦାର
ଦିଶଇ କେଡେ ମଞ୍ଜୁଳ
ନଦୀ ବିତରଇ ସୁଶୀତଳ ଜଳ
ବୃକ୍ଷ ଦିଏ ଫୁଲ ଫଳ ।।
କୀଟ ପତଙ୍ଗ ଠୁ ପଶୁ ପକ୍ଷୀ ଗଣ
ସୃଜି ଅଛ ଭିନ୍ନ ଭିନ୍ନ
ଫୁଲ ରେ ଭରିଛ ମଧୁର ସୁବାସ
ହରି ନିଏ ଜନ ମନ ।।
କୋଇଲିର କଣ୍ଠେ ସୁମଧୁର ସ୍ବର
ଗୁଣ୍ଡୁଚି ପିଠିରେ ଗାର
ଇନ୍ଦ୍ରଧନୁ ଦେହେ ସାତ ରଙ୍ଗ ପୁଣି
ପ୍ରଜାପତି ମନୋହର।।
ଅନ୍ତର୍ଯ୍ୟାମୀ ତୁମେ ଅନ୍ତରାଳେ ଥାଇ
ଚଳାଉଛ ଏଇ ମହୀ
ତୁମରି ନିର୍ଦ୍ଦେଶେ ଦିବାରାତ୍ରି ହୁଏ
ମାୟାରେ ପ୍ରାଣୀ ଭ୍ରମଇ।।
ଦୁନିଆର ଏଇ ରଙ୍ଗମଞ୍ଚେ ପ୍ରଭୁ
ଆମେ ସବୁ କଳାକାର
ଅନ୍ତରାଳେ ଥାଇ ଧରିଛ ପ୍ରଭୁହେ
ସଭିଙ୍କ ଜୀବନ ଡୋର।।
ସତ୍ୟ ଧର୍ମ ପଥେ ଘେନିଯାଅ ପ୍ରଭୁ
ଅନ୍ତରାଳେ ତୁମେ ରହି
ଜୀବନ ଦୀପ ମୋ ଲିଭିଯାଉ ପ୍ରଭୁ
ତୁମ ନାମ ଗାଇ ଗାଇ।।