ବଡଦେଉଳର କାଳିଆରାଜା
ବଡଦେଉଳର କାଳିଆରାଜା
ରତ୍ନ ପଲଙ୍କରେ ଶୋଉଛୁ କାଳିଆ
ରତନ ବେଦୀରେ ବସୁ
ଯିବା ଆସିବା ତୋ ରତ୍ନ ପାଲିଙ୍କିରେ
ରତ୍ନଚୂର୍ଣ୍ଣେ ଦାନ୍ତ ଘସୁ I
ଛତିଶ ନିଯୋଗ ତୋପାଖରେ ବନ୍ଧା
କେତେ ସେବା ପାଉ ବସି
ନାନାଜାତି ଖାଦ୍ୟ ତୋପାଇଁ ଖଞ୍ଜାରେ
ଖାଉଥାଉ ହସି ହସି I
ମୁରୁକି ମୁରୁକି ହସୁଥାଉ ସଦା
ଗଜମୋତି ପାନ ଖାଉ
ନିତି ନିଶିଥରେ ଦେବଦାସୀ ନୃତ୍ୟ
ଦେଖି ଦେଖି ନିଦ୍ରା ଯାଉ I
ରାଜକୀୟ ତୋର ଚଳଣିରେ ଜଗା
ତୁ କାହୁଁ ବୁଝିବୁ ଦୁଃଖ
ଦୁଃଖୀ ଜନ ଦୁଃଖ ଶୁଣୁଛୁ କି ନାହିଁ
କହ ଥରେ ପଦ୍ମମୁଖ ।
ତୁ ବଡ ଠାକୁର ବଡଦାଣ୍ଡ ତୋର
ତୋ ଘର ବଡ ଦେଉଳ
ମନୋବାଞ୍ଛା ପୂର୍ଣ୍ଣ କରେ କଳ୍ପବଟ
ବେଶ ତୋ ବଡ ସିଂହାର I
ସାରା ଜଗତର ନାଥ ବୋଲାଉଛୁ
ଭକତର ଭଗବାନ
ଜାଣିନି କିପରି ପୂଜିଲେରେ ତୋତେ
ତୁଷ୍ଟ ହେବ ତୋର ମନ I