ଗାଁ ରେ ଶୀତ ସନ୍ଧ୍ୟା

ହେଇତ,

ସହଁରା ଘରୁ 

କଞ୍ଚା ପୁଆଳ ର ଧୂଆଁ ଟା 

କୁହୁଳି କୁହୁଳି ଆସି

ଗାଁ ଟା ଯାକ ଖେଳି ଗଲାଣି l

ସହଁରେଇ ବୁଢ଼ୀ ଟା ପରା

ଏବେ ରୁ ନିଆଁ ଜାଳି

ନିଆଁ ପୋଉଛି

ଚାରିପଟେ ତା'ର ନାତି ନାତୁଣୀ

ମଉଜ ରେ ନିଆଁ ସହ

ଖେଳ ଖେଳୁଛନ୍ତି

ବୁଢ଼ୀ ଟା ସିନା ଗାଳି କରି ଚାଲିଛି

ହେଲେ ଶୁଣୁଚି କିଏ?

ତଳସାହି ର ଶୁକ୍ରୁ ମାଳି 

ନଈ ସେପାରି କଚାର କୁ

ବାଇଗଣ ବାଡି ଜଗିବାକୁ ବାହାରିଛି।

ଗୋଟେ ହାତରେ ନିଆଁ ଲଦା ଧରି

ଆର ହାତରେ ଫିକା

ଡସେଇ ଡସେଇ ଚାଲିଛି।

ସେଆଡକୁ

ବେଳ ନ ବୁଡୁଣୁ

କୋଲିଆ ଗୁଡ଼ା

ହୁକେ ହୁ ହୁକେ ହୁ କରି

ବୋବେଇ ଚାଲିଛନ୍ତି l

ଗାଁଟା ଯାକ ତ

ବଡ଼ ଚଳ ଚଞ୍ଚଳ

ସମସ୍ତେ ବ୍ୟସ୍ତ

କିଏ କିଏ ହଳ ଲଗେଇ 

ଧାନ ମଡେଇବାରେ ବ୍ୟସ୍ତ

କିଏ ପୁଣି ବର୍ଷକ ସାଇତି ରଖିବା ଲାଗି 

ପୁରା ବାନ୍ଧିବା ରେ ରତ।

ଏସବୁ ଦେଖି

ଶୀତ ନିଜେ

ମନେମନେ ଭାବୁଛି

ଏ ଚଷା ପୁଅଙ୍କୁ ଜମା ପାରିହେବନି

ଏମାନଙ୍କ କଲିଜା ସତରେ

ଖୁବ୍ ଟାଣ ।