ଲଗାଇନି ଆଉ ଧୂଳି
ଲଗାଇନି ଆଉ ଧୂଳି
ଆଗରୁ କହିଛି ଛୋଟପିଲାଙ୍କୁ ମୁଁ
ସ୍ନେହ କରେ ,ଯତ୍ନ ନିଏ ,
ଜାଣ ଅଜାଣତେ ଦୋଷ କରିଦେଲେ
ବୁଝାଇ ସଜାଡ଼ି ଦିଏ
ହରଷରେ ମୋର କଥା ମାନିଯା'ନ୍ତି
କଟାଳ କରନ୍ତି ନାହିଁ ,
କହନ୍ତି- "ଅପା ଯା' କହୁଛନ୍ତି ସବୁ
ଭଲ ଅଟେ ଆମ ପାଇଁ
ଏମିତି ଗୋଟିଏ ଝିଅ ଅଟେ 'ଇତି'
ଧରେ ତାକୁ କୁନିବେଳୁ ,
କେତେ ଗେଲ କରି ହସାଏ ଖେଳାଏ
ସୁସୁ କରେ ଖେଳୁ ଖେଳୁ
ପିଲାଟି ବେଳରୁ ନାକ କାନ୍ଦୁରି ସେ
ଧୀରେ ଧୀରେ ହେଲା ବଡ଼ ,
ଅବୁଝା ଯେମିତି କଳେହି ସେମିତି
ହୁଏ ଖାଲି ଭଡ଼ଭଡ଼
ଭଲ କହିଲେ ସେ ଭେଲ ବୁଝିକରି
ମୁହଁକୁ ଫୁଲେଇ ଦିଏ ,
ଜାଣିଶୁଣି କରେ ଓଲଟା କାମକୁ
ବୁଝାଇବ ତାକୁ କିଏ
ଅନ୍ୟପିଲା ସାଥେ ଝଗଡ଼ା ଲାଗଇ
ମନାକଲେ ଭାରି ଚିଡ଼େ ,
"ଭଲକାମ କଲେ ଆଦର ପାଇବୁ"
ଶୁଣି ମୁହଁ କରେ ଏଡ଼େ
ବଡ ହେବା ପରେ, ମିଛରେ ସେ ଦିନେ
କହିଲା ଭାଉଜ କାନେ ,
"ଅପା ସଦାବେଳେ ଗାଳିଦ୍ୟନ୍ତି ମୋତେ
ଶୁଣି କ୍ରୋଧ ଆସେ ମନେ
ଶୁଣିକି ଭାବିଲି ଏତେ ସ୍ନେହ କରି
ଓଗାଳୁଛି ଆସି ବିଷ ,
ସ୍ଵଭାଵ ଜମାରୁ ବଦଳିନି ତା'ର
କରିବି ମୁଁ ଆଉ କିସ
ଦୁଇଦିନ ଯାଏ ଆସିଲା ମୋ କ୍ରୋଧ
ଝିଅଟାକୁ ଦେଖୁଦେଖୁ ,
ଉଭାଇ ଗଲା ତା'-ଜାଗ୍ରତ କରିଲି
ଯେବେ ମୋର ବିବେକକୁ
ଈର୍ଷା ,ରାଗ ,ଦ୍ଵେଷ ଭଲଗୁଣ ନୁହେଁ
ତାହାଠୁ ତ ରହେ ଦୂରେ ,
ତୁଚ୍ଛା କଥାଟାରେ ଭାଳି ହୋଇ କିଆଁ
ରହିବି ମୁଁ ଦୁଃଶ୍ଚିନ୍ତାରେ
ନିନ୍ଦା ବା ପ୍ରଶଂସା ଯାହା କଲେ କରୁ
ସେସବୁ ମୁଁ ସହିନେବି ,
ବାକି ପିଲାଙ୍କୁ ଯା' ବାଣ୍ଟୁଛି ଖୁସିରେ
ତାକୁ ବି ସେମିତି ଦେବି
ସେନେହ ,ଆଦର କରିଲି ତାହାକୁ
ତା' ପରେ ବି ପୂର୍ବଭଳି ,
ହୃଦୟକୁ ମୋର ସ୍ୱଚ୍ଛ ମୁଁ ରଖିଲି
ଲଗାଇନି ଆଉ ଧୂଳି