ନୀଳଜହ୍ନ

ନୀଳ ନୀଳିମାକୁ ଜିଣି ଦୁଇ ଆଖି

ଖୋଜେ ମନ ଅନୁକ୍ଷଣ

ଘୂଞ୍ଚିଯାଉ ଦୂରେ ଉଆଁସ ଅନ୍ଧାର

ଦେଖାଦିଅ ନୀଳଜହ୍ନ ।

ହୃଦ ସହସ୍ରାରେ ନୀଳକନ୍ଦରରେ

ପୂର୍ଣ୍ଣଚନ୍ଦ୍ର ଉଦେହୁଅ

ବିକଶୁ କମଳ ଶାନ୍ତି ଶତଦଳ

ବିଶ୍ୱ ହେଉ ମଧୁମୟ ।

ବିମଳ ଜୋଛନା ହେଉ ପ୍ରତିଭାତ

ପ୍ରବହୁ ମଳୟାନିଳ

ବାସୁ ମହମହ ଶ୍ରୀଅଙ୍ଗ ଚନ୍ଦନ

ପ୍ରାଣ ହେଉ ସୁଶୀତଳ ।

ଦୁଃଖ ଅବସାଦ ଜୀବନ ଜଞ୍ଜାଳ

କଳାବାଦଲର ଫାଙ୍କେ

ଦିଶୁ ସମୁଜ୍ଜ୍ୱଳ ଶ୍ରୀମୁଖ ସୁନ୍ଦର

ସ୍ମିତହାସ୍ୟ ଥାଉ ଓଷ୍ଠେ ।

ଝରିପଡୁ ଶୁଭ ମଙ୍ଗଳ ଆଶିଷ

ପ୍ରତିଟି ମନ ଆକାଶେ

ହେ ଆନନ୍ଦମୟ କରୁଣା ନିଧାନ

ପାଦପଦ୍ମେ ଥାଉ ଆଶେ ।