ପର କରି ଦେଲ କଳା ଠାକୁର
ପର କରି ଦେଲ କଳା ଠାକୁର
ମୋତେ ଅଥଳ ଜଳରେ ଭସାଇ ଦେଲ
ପାଉନାହିଁ ଥଳ ପାଉନାହିଁ କୂଳ
ମଝି ଦରିଆରେ ହୁଏ ଆକୁଳ କଳା ଠାକୁର ।
ପର କରି ଦେଲ ପରମ
ପରାତ୍ପର କି ଦେଖି ଭ୍ରମ
ଛାଡ଼ିଦେଲ ହାତ ପ୍ରଭୁ ଜଗନ୍ନାଥ
ଡାକୁଛି ଅନାଥ ହୋଇ ଆତୁର କଳା ଠାକୁର ।
ଭାବ ରେ କି କଲି ଅଭାବ
ଭାବଗ୍ରାହୀ ମୋ ପ୍ରାଣଧବ
ଧନ ଜ୍ଞାନ ଦେବୀ ତୁମରି ବଲ୍ଲଭୀ
ବତାଇ ମୋ ଠାରୁ ନ କର ଦୂର କଳା ଠାକୁର ।
ମାତା ଅନ୍ନପୂର୍ଣ୍ଣା କରୁଣା
ସଦା କାଳେ ନହେଉ ଊଣା
ମହା ସରସ୍ୱତୀ ବାଗ୍ଦେବୀ ଭାରତୀ
ପ୍ରସାଦେ ବିକଶୁ ସୃଜନାଙ୍କୁର କଳା ଠାକୁର ।
ହେ ଛଳିଆ ବଳିଆଗ୍ରଜ
ନୀଳଗିରି କାଳିଆ ଗଜ
ଚକାଆଖିଆ ମୋ ନହେଲେ ପକ୍ଷିଆ
ଆଶ୍ରିବି ତଳପ ଚୌରାସ୍ୟାଙ୍ଗୁଳ କଳା ଠାକୁର ।
ଅନ୍ତର୍ଯ୍ୟାମୀ ଜଗତ ସ୍ୱାମୀ
ହୁଅ ନୟନ ପଥଗାମୀ
ତୁମେ ମୋ ନିଃଶ୍ୱାସ ପ୍ରଶ୍ୱାସ ବିଶ୍ୱାସ
ଡାକେ ବଗା ଜଗା ଉଦ୍ଧରି ଧର କଳା ଠାକୁର ।