ସଂଘର୍ଷ
ସଂଘର୍ଷ
ଜୀବନ ଦୋ' ଛକିରେ
ଜୀଇଁବା ଭାରି କଷ୍ଟ
ଏଠି ପ୍ରତି ମୁହୂର୍ତ୍ତେ ଚାଲେ
ସଂଘର୍ଷ ।
ଚାରିକାନ୍ଥ ଭିତରେ
ମୁଁ ଅଣ ନିଶ୍ବାସୀ
ପାଦେ ମୋହ ମାୟାର
ଶିକୁଳି ।
ମେଞ୍ଚା ମେଞ୍ଚା ମରୁ ପାହାଡ
ଗଛ ବି ଥୁଣ୍ଟା କଣ୍ଟା
କଙ୍କାଳ ଦେଖାଇ କାନ୍ଦୁଛି
ଅବୈଧ ଶିଶୁ ପରି ।
ଘନ କୁହୁଡିର ଚାଦର ଭିତରୁ
ଉଙ୍କିମାରେ ସୁନେଲି ସପନ
ହେଲେ ,ସବୁ ଝାପ୍ସା ଦିଶେ
ପାପ ଏଠି ସୁଗନ୍ଧିତ ଫୁଲ ପରି
ମହ ମହ ବାସେ ।
ମନ ଯେବେ ଖୋଜେ
ଚକ୍ ମକ୍ ରୂପେଲି ଜହ୍ନର ଛାୟା
ସରିଯାଏ ରାତିର ଆୟୁଷ
ସମୟ ସାଜେ ନିଅଣ୍ଟ ।
ବେଳେ ବେଳେ ମା' ବି କାନ୍ଦେ
ବୁକୁଫଟାଇ ବାହୁନୀ ବାହୁନୀ
ଫଟା ପଣତ ପାତି ଭିକ୍ଷା କରେ
ଜୀବନର ଶେଷ ସଂଘର୍ଷ ।
ଏଠି ମିଛ ନିଆଁରେ ବଞ୍ଚିବା ସାର
ସଂଘର୍ଷ ବିନା କିଛିତ ମିଳେନା
ସାଉଁଟିବାକୁ ହବ ଅନୁଭବ
ଆଉ ତିଆରି କରିବାକୁ ହେବ
ଜୀବନ ଜୀଇଁବା ସଂଘର୍ଷ ।।