ସଂପର୍କ ନଦୀର ତୀରେ
ସଂପର୍କ ନଦୀର ତୀରେ
ମେଘକୁ ମାଗିଲି ଘନ କଳା ରଙ୍ଗ
କଜ୍ଜ୍ଵଳ କରିବି ବୋଲି,
ମନା କରିଦେଲା କହିଲା ଝରିବି
ଧାରା ଶିରାବଣ ଭଳି ।
ଫୁଲକୁ ମାଗିଲି ସୁବାସ ତାହାର
ମୋ ଦେହର ବାସ୍ନା ପାଇଁ,
ମୁହଁ ମୋଡ଼ି ଗଲା ଭଅଁର ପାଖକୁ
ଆତୁରେ ରହିଲି ଚାହିଁ ।
କେକୀ କୁ ମାଗିଲି ସପ୍ତ ରଙ୍ଗ ବିଭା
କପାଳର ବିନ୍ଦି ଲାଗି,
କହିଲା ସାଇତି ରଖିଛି ସେ ତାକୁ
ମେଘ ରାଜା ପାଇଁ ମାଗି ।
ଭରା ବସନ୍ତ ରେ ଶୁଣିଲି କୋଇଲି
କୁହୁ କୁହୁ ମିଠା ରାଵ,
ମାଗିଲି ଯେମିତି କହିଲା କରିଛି
ମଧୁମାସ ସହ ଭାବ ।
ମାଗିଲି ଗିରିକୁ ଦେ ମୋତେ ଧୈର୍ଯ୍ୟ
ସହିବାକୁ ଯେତେ ଦୁଃଖ,
ଆନନ୍ଦେ ଦେଲା ସେ ପଣତରେ ମୋର
ନ ହୋଇ ତିଳେ ବିମୁଖ ।
ନାରୀ ଟିଏ ମୁହିଁ ପାଉଛି ଆଦର
ନଥାଇ ରଙ୍ଗ ବା ରୂପ,
ଧୈର୍ଯ୍ୟ ର ସହିତ ଯୁଝୁଛି ସଂସାରେ
ସହୁଛି ଦୁଃଖର ଧାପ ।
ଅଟଳ ରହିଛି ପାହାଡ଼ ଟେ ପରି
ଗଢିବାକୁ ମୋ ସଂସାର,
ମମତା ସୂତାରେ ବାନ୍ଧିଛି ସଭିଙ୍କୁ
ନାହିଁ କେ ଆପଣା ପର ।
ସମ୍ପର୍କ ନଦୀରେ ଭସାଇ ଦେଇଛି
ନିଷ୍ପାପ ମନର ନାଆ,
ଦୁଃଖୀ ର ଓଠରେ ଫୁଟାଉଛି ହସ
ଦେଇ ଭରସାର ବାଆ ।
ସବୁ ସଂପର୍କ କୁ ବାନ୍ଧିଛି କାନି ରେ
ଦେଇ ବିଶ୍ବାସର ଗଣ୍ଠି,
ଜନନୀ ଭଗିନୀ ଜାୟା ,କନ୍ୟା ରୂପ
ଦେଖୁଛି ଦୁନିଆଁ ମୋ'ଠି ।
ସନ୍ତାନକୁ ଦିଏ ସ୍ନେହ ଓ ମମତା
ଯଶୋଦା ମାତାଙ୍କ ପରି,
ଭଉଣୀ ପରି ମୁଁ ମଙ୍ଗଳ ମନାସେ
ସୁଭଦ୍ରାଙ୍କୁ ଅନୁସରି ।
ଜାୟା ରୂପେ ମୁଁ ଯେ ଅର୍ପଣ କରିଛି
ତନୁ ମନ ସ୍ୱାମୀ ଠାରେ,
ଦେବୀ ସୀତା ଆଉ ଅନୁସୂୟା ପରି
ହେବାକୁ ଚିନ୍ତେ ମନରେ ।
ସାବିତ୍ରୀ ଙ୍କ ପରି କନ୍ୟା ହେବି ମୁଁ ଯେ
ଦୁଇ କୁଳେ ହେବି ହିତା,
ସମ୍ପର୍କ ନଦୀଟି ହେବ ମୋର ସ୍ନେହ
ପ୍ରେମରେ ସଦା ପ୍ଳାବିତା ।
ସ୍ନେହ ସମ୍ପର୍କ ଯେ ସବୁଠୁ ଅମୂଲ୍ୟ
ତୁଳନା ନାହିଁ ତାହାର,
ସାରା ବସୁଧା ମୋ ଗୋଟିଏ କୁଟୁମ୍ବ
ଗୋଟିଏ ସୂତାର ହାର ।