ಕೃಷ್ಣಾ!!!!!
ಕೃಷ್ಣಾ!!!!!
ಅಮ್ಮನ ತೋಳ್ತೆಕ್ಕೆಯಲಿ ಬೆಚ್ಚನೆಯಪ್ಪುಗೆಯಲಿ
ಗುಮ್ಮನ ನೆನೆದು ....ಕಂಗಳರಳಿಸಿ ಬೆರಗಿನಲಿ...
ಇನ್ನಷ್ಟು ಹತ್ತಿರಕೆ ಒತ್ತಿ ಕುಳಿತ ಮುದ್ದು ಕಂದನಲಿ
ನನಗೆಂತಹ ಸೆಳೆತ ಗೊತ್ತುಂಟಾ ನಿಮಗೆ ?
ಆಡಿದರೆ ನೊಂದಾನು ನಡೆದರೆ ದಣಿದಾನು
ಮಲಗಿದರೆ ಹಸಿದಾನು ಎದ್ದರೆ ಬಿದ್ದಾನು..
ಎಷ್ಟು ಚಿಂತೆಗಳು ಅಂದು ..ನಂದಗೋಪಾಲ
ಅನಿಸಿತ್ತು ಮಿಕ್ಕ ಬದುಕೆಲ್ಲ ನಿನಗೇ ಮೀಸಲು..
ಆದರೇನು ? ನೀ ಬೆಳೆದೆ ಕಳೆದೆ ಬಂಜೆತನವ
ಎಳೆದೊಯ್ದೆ ನನ್ನ ತಾಯ್ತನವ ದೂರದೂರಿಗೆ
ಮಮತೆಗಳು ಮೌನ ಮಾತುಗಳ ಬಲೆಯಲ್ಲಿ
ನಿನ್ನೊಂದು ದನಿಯ ಕೇಳಲು ಕ್ಷಣಗಣನೆಯಲಿ...
ಮಿಡುಕುವ ಅರೆಜೀವಕೆ ಒಂದೇ ಆಸೆ ಕಂದಾ, ನೀನೊಮ್ಮೆ "ಅಮ್ಮಾ..!"
ಎಂದು ಬರಸೆಳೆದರೆನಿತು ಸೊಗಸು.
ಕೃಷ್ಣಾ!! ಸಾಕೆನಗೆ ಈ ಬದುಕು, ಇರಿಸಿಬಿಡೆನ್ನನು ಆ ನಿನ್ನ ಮುದ್ದು ಪಾದಕಮಲದಲ್ಲಿ.