మృగంలా..
మృగంలా..
పరిస్థితుల ప్రభావం అనేస్తే
రాత అని వదిలేస్తే
బాధ్యత తీరిపోతుందా
మృగంలా మారాడని
పోలిస్తే సరిపోతుందా
దేశమంటే మనుషులే సరే
మరి వారి ప్రవర్తన సంగతేంటి
రోజుకో కొత్త జాడ్యం
సమాజపు అస్థిత్వాన్ని ప్రశ్నిస్తోంది
చెవులు మూసుకుంటావా
చంద్రుణ్ణి తాకినా
ఆకాశాన్ని ఏలినా
మనిషిలో కలగాల్సిన మార్పు ఎక్కడ
ఏ శీతల పవనమో
పావనభరిత కీర్తన చరణమో
యుగ ధర్మంలో చలనాన్ని తీసుకువస్తుందో
ఎవ్వరికెరుక
ఓ మృగంలా
చీకటి రాత్రుల కోసం వేటాడి
అలసిపోయిన స్థితిలో
ఇంకెంత దూరం పారిపోవాలి
నిన్ను నువ్వు గుర్తు పట్టని స్థితిలో
కొత్త పాటను ఎలా నేర్చావు
మనసులోని దిగులును
మాటల్లో చెప్పలేక
కవిత్వంలో నీకు నువ్వే చితి పేర్చావు