సరాగాలు

ముద్దుల ముద్దకూర మురిపాలవేపుడు

కమ్మగావండి వయ్యారంతో వేడిగా వడ్డిస్తే..

ఒళ్ళువేడెక్కి జ్వరమొచ్చింది అన్నావురా!

కౌగిళ్ళనే కొనగోటితో కోసి కలగూరగా కలిపి

కడుపసందుగా కవ్వింతలతో అందించబోతే..

కళ్ళున దగ్గితే కంగారులో పొలమారె కదరా!

వలపు వగలనే వడగాచి మసాల దట్టించి

ఇగురు కూరను ఇంపుగా ఆరగించమంటే..

అరగదని చెప్పి ఆయాసపడతావు ఏందిరా!

పులుపు పరువాన్ని పప్పుపులుసుగా పోపేసి

నాజూకు చేతులతో నెయ్యివేసి తినిపించబోతే..

వికారమని వింతాకారాలే చూపుతున్నావురా!

చిక్కటిపాల మదినే గడ్డపెరుగుగా తోడుపెట్టి

అల్లరి ఆవకాయనే నంజుగా అద్దుకోమంటే..

పడిసెమంటూ పట్టెమంచం ఎక్కినావేందిరా!

ఈ విచిత్ర విన్యాసాల చోద్యమేమని ఆరాతీస్తే

వలచినవాడి మనసుదోచ వంటావార్పులేల..

కలువభామను చూసి కడుపునిండెనన్నావురా!