ಅಪ್ಪನ ಕೂಸು

ಎಂಥ ಮೋಜು ಎಂಥ ಸೊಗಸು 

ಅಪ್ಪನೊಡನೆ ಆಡಲು/

ಮನೆಗೆ ನಾನೇ ಪುಟ್ಟ ಕೂಸು 

ತುಂಟಾಟವನು ಮಾಡಲು//

ಹೊರಗೆ ಹೋಗುವೆ ನನ್ನ ಕಳಿಸು 

ಎಂದರೆ ಕೇಳದೆ ಇರಲು/ 

ಒಳಗೆ ಇರುವೆ ತಂಟೆ ಸಹಿಸು 

ಎಂದು ನಾನು ಕಾಡಲು//

ಅಪ್ಪನ ತಲೆಯೆ ನನಗೆ ಸಲೀಸು 

ಬ್ಯಾಂಡು ಕ್ಲಿಪ್ಪು ಹಾಕಲು/

ಓರೆ ನೋಟದ ಅಪ್ಪನ ಮುನಿಸು 

ನನಗೆ ಸಾಕು ನಗಲು//

ಅಪ್ಪ ನಿನ್ನ ಪುಸ್ತಕ ಸರಿಸು 

ನಾನಿರುವೆ ಸಮಯ ಕಳೆಯಲು/

ಅಮ್ಮ ನೋಡುವಳೆ ಮೊದಲು ತಿಳಿಸು 

ಅವಳೆಂದರೆ ನನಗೆ ದಿಗಿಲು//

ಅಪ್ಪ ನೀನು ನನ್ನ ಮುದ್ದಿಸು 

ನಿನ್ನ ಪ್ರೀತಿ ನಿತ್ಯ ಹೊನಲು/

ಸದಾ ತುಂಬಿರುವೆ ನನ್ನ ಮನಸು

ಸ್ವರ್ಗಕೂ ಮಿಗಿಲು ನಿನ್ನ ಒಡಲು//