ಸಂಕ್ರಾಂತಿ ಸುಗ್ಗಿ

ಪ್ರಕಾರ :- ಉತ್ಸಾಹ ಲಯ 

ಹಿಗ್ಗು ತರಲು ಬುವಿಯ ಮೇಲೆ 

ಸುಗ್ಗಿ ಕಾಲ ಬಂದಿದೆ/

ಮೊಗ್ಗು ತಾನು ಅರಳಿ ನಿಂತು 

ಸಗ್ಗವಿಲ್ಲೆ ಎಂದಿದೆ//

ಮಕರ ರಾಶಿ ಸೇರಿ ಸೂರ್ಯ 

ಸಕಲ ಜಗವ ಪೊರೆಯುವ/

ನಿಕಟ ಶಾಖ ಧರೆಗೆ ಬಿತ್ತಿ 

ಮುಕುರದಂತೆ ಹೊಳೆಯುವ//

ಸೈನ್ಯದಂತೆ ದುಡಿದ ಜನರು 

ಮಾನ್ಯತೆಯನು ಪಡೆವರು/

ಧಾನ್ಯಗಳನು ರಾಶಿ ಮಾಡಿ

ಧನ್ಯತೆಯನು ಮೆರೆವರು//

ಸೊಗಡು ತಂದ ಅವರೆ ಜೊತೆಗೆ 

ದುಗುಡ ದೂರವಾಗಿದೆ/

ಹಗುರವಾದ ಭಾವದಿಂದ 

ನಗುವು ಜಗದಿ ಹರಡಿದೆ//

ಗಾಳಿ ಪಟವು ಬಾನಿನಲ್ಲಿ

ಗೂಳಿಯಂತೆ ನುಗ್ಗಿದೆ/

ಬಾಳಿಗೊಂದು ನಲಿವು ಬಂದು

ಕಾಳರಾತ್ರಿ ಕಳೆದಿದೆ//

ಹಳ್ಳಿ ಜನರ ಕಣವ ಕಂಡು

ಬಳ್ಳಗಳವು ಹಿಗ್ಗಲಿ/

ಎಳ್ಳು ಬೆಲ್ಲ ಕಬ್ಬು ಗೆಣಸು 

ಒಳ್ಳೆಯದನು ಮಾಡಲಿ//